Անկախ Հայաստանի պատմության ընթացքում առաջին անգամն է կառուցվում կառավարական համալիր. Նարեկ Սարգսյան

Երևանում՝ Վազգեն Սարգսյան 3 հասցեում այսօր կբացվի նորակառույց կառավարական վարչական համալիրը, որի շինարարության մեկնարկը տրվել է 2013 թվականի ապրիլին:

Նոր համալիրը կառուցվել է Արդարադատության նախարարության նախկին այրված շենքի և շուրջ 25 տարի չգործող, վերականգնման ոչ ենթակա կենտրոնական շրջանային կաթսայատան հողատարածքի վրա:

Համալիրի կառուցապատված և բարեկարգված տարածքն ընդգրկում է նախկին Սևան հյուրանոցի սահմանագծից մինչև ՀՀ Գլխավոր դատախազության շենք և Վ. Սարգսյան փողոցից մինչև Զաքյան փողոցի հատվածը:

Գլխավոր մասնաշենքում կտեղակայվեն արտաքին գործերի՝ այդ թվում դիվանագիտական ակադեմիայի, կրթության  գիտության, մշակույթի, սփյուռքի նախարարությունները:

Առանձնացված մասնաշենքում, որը գտնվում է Զաքյան փողոց նայող հատվածում, կտեղափոխվի Արդարադատության նախարարությանը: Վարչական երկու մասնաշենքերը միմյանց հետ կապված են ստորգետնյա մեկհարկանի ավտոկայանատեղիով:

Գլխավոր մասնաշենքի հորինվածքը հնարավորություն է ընձեռել տարբեր գերատեսչությունների համար ստեղծել առանձնացված մուտքերով, նախասրահներով, վերելակներով և աստիճանավանդակներով ապահովված գործունեության պայմաններ:

Ինչպես լրագրողների հետ զրույցում նշեց վաստակավոր ճարտարապետ Նարեկ Սարգսյանը, շենքի ճարտարապետական լուծումներ մշակվել են քաղաքաշինական և ազգային ճարտարապետական մոտեցումներին համահունչ, կառավարական վարչական համալիրին հաղորդելով մոնումենտալ կերպար:

«Ընդհանուր առմամբ բարդ խնդիր էր տեղաբաշխել նախարարությունները. սկզբից նախատեսված էր այստեղ տեղափոխել չորս նախարարություն, հետագայում դարձավ հինգ նախարարություն: Տարածքը մոտ 5000 քմ է և այդ տարածքում կազմակերպել բոլորի առանձնացված մուտքերը և մոտեցումները՝ դյուրին խնդիր չէր: Անկախ Հայաստանի պատմության ընթացքում առաջին անգամն է կառուցվում կառավարական համալիր: Կարևորն այն էր, որ ճարտարապետությունը լինի շարունակությունը բոլոր այն շենքերի, որ մենք ունեցել ենք մինչև հիմա»,- ասաց Նարեկ Սարգսյանը:

Ներկայացնելով շինությունը նա նշեց, որ նախագծի մշակման ճարտարապետական հայեցակարգի համար հիմք է ծառայել նախկինում այս հատվածում գտնվող արդարադատության նախարարության շենքի ծավալատարածական հորինվածքը:

Նոր նախագծում վերամշակված ձևով կրկնվել է ոչ միայն ճակատների կոր պլաստիկան և մի շարք այլ լուծումները, այլև վերաշարադրված է նախկինում գոյություն ունեցող աշտարակը, դարձնելով այն կոմպոզիցիոն առանցք Շահումյանի հրապարակի նկատմամբ:

Պահպանված են նաև նախկին շենքի պարագծային լուծումները և անմիջապես հարևանությամբ գտնվող շենքի մասշտաբային հարաբերությունները՝ ստանալով առաջին պլանում մինչև 24 մետր բարձրությամբ 6 հարկանի շինություն:

Նշվեց նաև, որ Վազգեն Սարգսյան փողոցի կողմից կամարակապ շքամուտքն ունի 12,5 մետր լայնություն և 16,5 մետր բարձրություն:

«Շինության կամարը վերածել ենք  հաղթակամարի, իսկ կամարի աջ և ձախ կողմերում կան զարդաքանդակներ, որոնք կառավարական շենքերի զարդաքանդակների կրկնությունն են»,-ընդգծեց Նարեկ Սարգսյանը:

Նա տեղեկացրեց, որ մինչև փետրվարի վերջ բոլոր հինգ նախարարությունները կտեղափոխվեն կառավարական վարչական համալիր:

«Նախարարությունների բնականոն գործընթացը չպետք է խաթարվի և հատված առ հատված մինչև փետրվարի վերջ կտեղափոխվեն այստեղ»,- ասաց նա:

Նարեկ Սարգսյանը վստահ է, որ նախարարության աշխատակիցները գոհ կլինեն այս պայմաններից, քանի որ դրանք շեշտակի բարելավվել են և այս նոր համալիրը համեմատելու չէ նախարարությունների շենքի հետ:

«Սա երկրի դիմագիծը ձևավորող կարևոր կառույցներից մեկն է»,- եզրափակեց Նարեկ Սարգսյանը: