Հրատարակության է պատրաստվում Սամվել Մկրտչյանի առաջին թարգմանությունը` «Միջամառային գիշերվա երազը»

Փետրվարի 25-ին` տաղանդավոր բանաստեղծ, թարգմանիչ, խմբագիր Սամվել Մկրտչյանի ծննդյան օրվան ընդառաջ լույս կընծայվի նրա առաջին թարգմանությունը՝ Ուիլյամ Շեքսպիրի  «Միջամառային գիշերվա երազ»-ը, որը նա, ի դեպ, թարգմանել է 23 տարեկան հասակում: Tert.am-ի հետ զրույցում ասաց ԱԺ պատգամավոր  Նաիրա Զոհրաբյանը:

«Դա Սամվելի առաջին թարգմանությունն է եղել Շեքսպիրից: Իսկ սոնետները նա թարգմանել է 25 տարեկանում: Գործը անտիպ էր, 23 տարեկանում թարգմանել ու այդպես մնացել էր: Ու Սամվելը  այդ ` «Միջամառային գիշերվա երազ»-ին թեթևսոլիկ երազ էր ասում»,- պատմեց Նաիրա Զոհրաբյանը:

Գիրքը  տպագրության էր պատրաստել հենց Սամվել Մկրտչյանը, ով, սակայն, չհասցրեց այն ավարտին հասցնել:  Սակայն գրքի  շապիկի ձևավորումը իրենն է:

Հիշեցնենք, որ  Սամվել Մկրտչյանի շնորհիվ հայ ընթերցողը հնարավորություն ստացավ  հայերենով   կարդալ համաշխարհային և հատկապես` ամերիկյան ու  անգլիական այնպիսի հեղինակների ինչպիսիք են  Թոմաս Էլիոթը, Ջոն Նյումանը, Էդգար Ալան Պոն,  Ուիլյամ  Ֆոլքները, Շեքսպիրը  և ուրիշներ: Սակայն Սամվել Մկրտչյանի մեծածավալ  գործը Ջեյմս Ջոյսի «Ուլիսես» վեպի թարգմանությունն է, ինչի համար տաղանդավոր թարգմանիչը ստացավ  ԱՊՀ երկրների գրահրատարակիչների գլխավոր մրցանակը,  նաև` գրքի հրատարակության ու  ձևավորման համար:

Պատահական չէ, որ Դուբլինում՝ Ջեյմս Ջոյսի թանգարանում, Սամվել Մկրտչյանի «Ուլիսեսի» հայերեն թարգմանությունն իր  հաստատուն տեղն ունի վեպի եզակի թարգմանությունների շարքում։

Սամվել Մկրտչյանն ինքը թարգմանությունը համարում էր  ստեղծագործական գործընթաց, անգամ` մարտահրավերի պես մի բան, որը պետք էր հաղթահարել:

Փետրվարի 25-ին` թարգմանչի ծննդյան օրը, Հանրային հեռուստատեսությունը  կհեռարձակի նրան նվիրված ֆիլմը: