SpaceX-ը մտադիր է մինչև 2018-ը թռիչք իրականացնել դեպի Մարս

SpaceX  ամերիկյան տիեզերական ընկերությունը որոշել է մինչև 2018 թվականը տիեզերանավ  ուղարկել Մարս: Ինչպես փոխանցում է  Meduza գործակալությունն, այս մասին ընկերությունը հայտնել է թվիթերյան էջի միջոցով:

Մարսիական առաքելության համար նախատեսված տիեզերանավը կստանա Red Dragon անվանումը: Ընկերությունը նշել է, որ առաքելության շրջանակներում Մարսի մակերես մեծ բեռներ հասցնելու տեխնոլոգիաներ կմշակվեն:

Առաքելության հաջողության դեպքում SpaceX-ը կդառնա Մարս տիեզերանավ ուղարկող առաջին  մասնավոր ընկերությունը:

Միլիարդատեր Էլոն Մասկին պատկանող SpaceX ընկերությունը ՆԱՍԱ-ի հետ պայմանագրի համաձայն զբաղվում է Dragon տիեզերանավերով բեռների տեղափոխմամբ Միջազգային տիեզերակայան: