Համացանցում է հայտնվել Մոսկվայում բանկ գրաված Արամ Պետրոսյանի ձերբակալության տեսանյութը

09:19 • 25.08.16

Life.ru կայքը հրապարակել է Մոսկվայում «Սիթիբանկ»-ի մասնաճյուղը գրաված գործարար Արամ Պետրոսյանի ձերբակալության տեսանյութը:

 

Տեսանյութում երևում է, թե ինչպես են իրավապահները նրան դուրս բերում բանկի շենքից, որտեղ նա ավելի վաղ պատանդ էր վերցրել և սպառնում էր պայթեցնել շենքը:

 

Ինչպես РИА Новости-ին հայտնել է իրավապահ մարմիններում աղբյուրը, տղամարդը կարող է խուսափել պատանդներ վերցնելու համար նախատեսված պատժից, քանի որ ինքնակամ բաց է թողել նրանց և հանձնվել:

 

Իրավապահ մարմիններում աղբյուրը հայտնել է նաև, որ բանկը գրաված մարդը ենթադրաբար սնանկացած գործարար է եղել: Դրանից առաջ համացանցում հայտնվել է տղամարդու տեսաուղերձը, որտեղ նա իրեն անվանում է Արամ Պետրոսյան և պահանջում է Ռուսաստանի իշխանություններից ստեղծել հատուկ մարմին, որը կզբաղվեր սնանկությունների խնդրով:

 

Ոստիկանության հետ բանակցությունների ընթացքում նա բաց է թողել բոլոր պատանդներին, իսկ այնուհետև հանձնվել: Առարկան, որը նա որպես ռումբ էր ներկայացնում, կեղծ է եղել: