Կարո Եղնուկյանի կալանավորման դեմ բողոքի ակցիա Գլխավոր դատախազության մոտ

17:52 • 25.08.16

ՀՀ գլխավոր դատախազության մոտ «Հիմնադիր խորհրդարանի» անդամ Կարո Եղնուկյանի կալանավորման դեմ բողոքի ակցիա են հրավիրել նրա հարազատներն ու մի խումբ քաղաքացիներ: Հավաքվածները համարում են, որ կալանավորումն ապօրինի է, իսկ Կարո Եղնուկյանը քաղհալածյալ և քաղբանտարկյալ է: Նրանք պահանջում են անհապաղ ազատ արձակել Եղնուկյանին:

Ակցիայի մասնակիցներին են միացել նաև ավելի վաղ ՀՀ արդարադատության նախարարության Քրեակատարողական հիմնարկների վարչության մուտքի մոտ հավաքվածները, որոնք «Սասնա ծռեր» խմբի անդամներին հայտնում էին իրենց աջակցությունը:

Հիշեցնենք, որ Կարո Եղնուկյանին մեղադրանք է առաջադրվել քրեական օրենսգրքի 218 և 219 հոդվածներով` պատանդ վերցնելուն, շենքեր, շինություններ, տրանսպորտի, հաղորդակցության կամ կապի միջոցներ զավթելուն աջակցելու համար: Նշենք, որ այդ հոդվածներով նախատեսվում է 8-15 տարվա ազատազրկում: 

Եղնուկյանի դուստրը՝ Էմնո Եղնուկյանը հայտարարեց, որ որևիցե պատճառ չկա իր հայրիկին մեկուսարանում պահելու: «Նա այն մարդը չէ, որ կարող է խանգարել նախաքննության պրոցեսին»,-ասաց նա:

Հավաքվածները բացականչում էին՝ «ա-զա-տու-թյուն, ա-զա-տու-թյուն»:

Ակցիայի մասնակիցների թվում է նաև ԱԻՆ առաջնորդ Պարույր Հայրիկյանը: Նա մեծագույն խայտառակություն համարեց «անկախության համար պայքարած Եղնուկյանի անհիմն մեղադրանքը, այն էլ՝ Անկախության 25-ամյակի նախաշեմին»:

«Դուք սեղանների տակ շոտիկներով էիք վազվզում, երբ Կարո Եղնուկյանը, ԱՄՆ-ում ապրելով, պայքարել է անկախության համար: 88-ից պայքարել է. երբ բոլորդ մթագնած ուղեղով գոռում էիք «Ղարաբաղ» կամ էլ «Լենին-պարտիա –Գորբաչով», ինքն ասում էր՝ «Արցախի ինքնորոշում»»,-ասաց նա: