6 մասնագիտություն, որտեղ ռոբոտներն ապագայում կփոխարինեն մարդկանց

Այն, ինչ տասնամյակներ առաջ ֆանտաստիկա էր համարվում կամ հեռու ապագայի գործ, այսօր արդեն իրականություն է։ Ռոբոտներն ու բարձր տեխնոլոգիաներն արդեն վաղուց մեր կյանքի մի մասն են կազմում և շուտով պատրաստվում են նորանոր ոլորտներ գրավել:

Այս մասին գրում է РИА Новости-ն` ներկայացնելով ռոբոտատեխնիկայի առաջիկա նվաճումներն ու այն գործառույթները, որոնք ռոբոտները կանեն մարդկանց փոխարեն:

1. Վարորդ

Այսօր արդեն աշխարհում երկու տաքսի ծառայություն է գործում, որոնք ինքնագնաց մեքենաներ են կիրառում: Այդ ծառայություններն են ամերիկյան Uber-ը և սինգապուրյան nuTonomy-ն: 2018-ին սինգապուրյան ընկերությունը մտադիր է իր բոլոր մեքենաները ինքնագնացներով փոխարինել:

2. Սուրհանդակ

Բազմաթիվ փոստային ծառայություններ և տրանսպորտային ընկերություններ տարատեսակ անօդաչու թռչող սարքեր են փորձարկում`դրանք կիրառելով տարբեր առարկաների առաքման համար:

3. Ուսուցիչ

Օտար լեզուների հեռակա ուսուցումը և տարատեսակ դասընթացներն ինտելեկտուալ ավտոմատացված համակարգերի միջոցով արդեն իրականություն է: Առավել կատարելագործված տեխնիկաներն ու համակարգերը դեռևս փորձարկման փուլում են գտնվում:

4. Պարեկ

Պարեկային ռոբոտների հիմնական առաջադրանքները տեղանքում հերթապահություն իրականացնելն է հնարավոր խախտումները հայտնաբերելու և օպերատորներին դրանց մասին տեղեկացնելու համար:

5. Բեռնակիր

Տարբեր իրեր բերելն ու տանելը ռոբոտներին սովորեցրել են արդեն վաղուց: Այժմ զարգանում է բեռնակիր-ռոբոտների ոլորտը, որոնք ծանր առարկաներ են տեղափոխում խոշոր ընկերությունների պահեստներում:

6. Կենսաչափական պրոթեզներ

Ռոբոտատեխնիկայի մասին խոսելիս անհնար է մոռանալ նորագույն պրոթեզների մասին, որոնք օգնում են մարդկանց հաղթահարել մարմնի առանձին մասերի բացակայությամբ պայմանավորված բարդությունները: