Samsung-ը դադարեցնում է նաև «անվտանգ» խմբաքանակից Galaxy Note 7-երի վաճառքը

Հարավկորեական Samsung տեխնոլոգիական ընկերությունը պատրաստվում է գործընկերներից ու սեփական արտադրանքը վերավաճառող ընկերություններից պահանջել դադարեցնել տեխնիկական խնդիրներից զերծ և «անվտանգ» համարվող խմբաքանակից Galaxy Note 7 սմարթֆոնների վաճառքը:

Ինչպես նշում է gazeta.ru-ն, սեպտեմբերին ներկայացված գաջեթների վաճառքի ժամանակավոր արգելքը գործելու է ամբողջ աշխարհում:

Աղբյուրը մանրամասնում է, որ Samsung-ի որոշումը պայմանավորված է այն փաստով, որ ընկերությունը բողոքներ է ստանում նաև «անվտանգ» համարվող խմբաքանակից Galaxy Note 7 սմարթֆոնների այրման և այլ անսարքությունների վերաբերյալ:

Ավելի վաղ հարավկորեական արտադրողը խնդրել էր օգտատերերին հրաժարվել նոր սմարթֆոններից ու անջատել դրանց սնուցումը:

Նշվում է, որ AT&T, Verizon և T-Mobile ընկերություններն արդեն դադարեցրել են Samsung Galaxy Note 7-ի վաճառքը:

Ինչպես ավելի վաղ հայտնել էր Tert.am-ը, Samsung-ը միառժամանակ դադարեցրել է արտահանման համար նախատեսված Galaxy Note 7 սմարթֆոնի արտադրությունը, ինչը պայմանավորված է մարտկոցների անսարքությամբ:

Ընկերության՝ Վիետնամում գտնվող և միջազգային մատակարարումներով զբաղվող գործարանը ժամանակավորապես դադարեցնում է աշխատանքը:

Նոր սմարթֆոնի վաճառքը Հարավային Կորեայում մեկնարկել էր օգոստոսի 19-ին, սակայն սեպտեմբերի սկզբին ընկերությունը ստիպված է եղել համաշխարհային շուկայից հետ կանչել 2.5 մլն Galaxy Note 7, երբ պարզվել է դրանց մարտկոցներում առկա տեխնիկական անսարքությունների մասին: