ԻՊ-ը Մոսուլում մահապատժի է ենթարկել 284 մարդու, այդ թվում՝ երեխաների. CNN
«Իսլամական պետություն» ահաբեկչական խմբավորման անդամները հոկտեմբերի 20-ին և 21-ին մահապատժի են ենթարկել 284 մարդու, որոնց նախապես հավաքել էին իրաքյան Մոսուլի ծայրամասում որպես «կենդանի վահան» օգտագործելու նպատակով, հայտնում է CNN հեռուստաալիքը՝ Իրաքի անվտանգության ծառայություններում աղբյուրի հղումով։
Ինչպես նշվում է՝ մահապատժի ենթարկվածների թվում եղել են նաև տղա երեխաներ։ Նրանց բոլորին գնդակահարել են։ Ոճրագործությունից հետո սպանվածների մարմինները բուլդոզերով նետել են ընդհանուր գերեզմանը։
СNN-ը նշում է, որ այս տեղեկությունը պաշտոնապես դեռ չի հաստատվել։
Հիշեցնենք, որ իրաքյան զինուժն ու քրդական զինված խմբավորումները Մոսուլի ազատագրման գործողությունը սկսել են հոկտեմբերի 17-ին։ Նրանց աջակցում է ԱՄՆ-ի գլխավորած միջազգային կոալիցիան։










