Տվյալներ, որոնցով չարժե կիսվել սոցցանցերում

Ժամանակակից աշխարհում մարդկանց մեծ մասն ակտիվորեն օգտվում է սոցցանցերից, որոնք վաղուց արդեն դարձել են մարդու առօրյայի անբաժան մասը:

Մեզանից շատերը վիրտուալ տիրույթի իրենց անձնական էջերում կիսվում են տարատեսակ տեղեկություններով, որոնք հաճախ վերաբերում են անձնական կյանքին:

Ստորև indy100.com կայքն առաջարկում է ծանոթանալ այն թեմաներին ու տվյալներին, որոնցով, ելնելով անվտանգության նկատառումներից, խորհուրդ չի տրվում կիսվել սոցկայքերում:

1.     Անձնագրի կամ վարորդական իրավունքի լուսանկարներ

Դրանցում առկա տվյալները կարող են պիտանի լինել կեղծարարների համար՝ հնարավորություն տալով հակաօրինական գործողություններ իրականացնել ձեր դեմ:

2.     Հանգստի մեկնման վերաբերյալ ծրագրեր

Այս տեղեկությունը կարող է հատկապես օգտակար լինել պոտենցիալ կողոպտիչների համար, որոնք ստույգ տեղեկություն կունենան տնից ձեր բացակայության ժամկետի վերաբերյալ:

3.     Տան հասցեն

 Այս տեղեկության հրապարակումը վտանգավոր է հասկանալի պատճառներով:

4.     Երեխաների լուսանկարներ

Ձեր փոքրիկի լուսանկարը հրապարակելուց առաջ ուշադիր եղեք, որպեսզի այն տեսանելի լինի միայն ընկերների համար և չհայտնվի կասկածելի անձանց տեսադաշտում:

5.     Բողոք պարունակող գրառումներ աշխատավայրի կամ ղեկավարի մասին

Մեր իրականությունում քիչ չեն դեպքերը, երբ մարդիկ կորցրել են իրենց աշխատանքը հակասական գրառման պատճառով: Ուստի՝ հիշեք, որ կան թեմաներ, որոնք նախատեսված են սոսկ անձնական զրույցի համար:

6.     Գտնվելու հստակ վայրի և ժամի մասին գրառումներ

Միգուցե մեկը, ով ուզում է վնասել ձեզ, կարող է օգտագործել ձեր գտնվելու հստակ վայրի ու ժամի մասին տեղեկությունը՝ իր նպատակի իրականացման համար:

7.     Ինտիմ լուսանկարների հրապարակում

Նույնիսկ եթե դուք ինտիմ լուսանկար եք հրապարակել անձնական էջում ու կարգավորումների բաժնում այնպես եք արել, որ այն տեսանելի լինի միայն մի հոգու, այնուհանդերձ՝ ձեր էջը կարող է հաքերային հարձակման ենթարկվել: