Պենտագոնի ղեկավարը չի բացառել Մոսուլից ԻՊ-ի գրոհայինների հնարավոր փախուստը Սիրիա

10:20 • 03.11.16

ԱՄՆ ռազմական գերատեսչության ղեկավար Էշթոն Քարտերը հայտարարել է, որ Իրաքի Մոսուլ քաղաքում շրջափակման մեջ գտնվող «Իսլամական պետություն» ահաբեկչական խմբավորման գրոհայինները կարող են Սիրիա փախչել, գրում է «ՌԻԱ Նովոստի»-ն:


Միսուրի նահանգի Ֆորտ Լեոնարդ Վուդում ռազմական բազայում տեղի ունեցած մամուլի ասուլիսի ժամանակ լրագրողները հետաքրքրվել են Քարտերից, թե արդյոք Մոսուլից Սիրիա գրոհայիններին քշելը եղել է քաղաքի ազատագրման պլանի մաս: Պենտագոնի ղեկավարը չի մանրամասնել Մոսուլի ազատագրման պլանը՝ նշելով, որ այն գոյություն ունի արդեն մեկ տարուց ավելի:


«Ծրագիրը միշտ կայացել է Մոսուլն արևելքից, հյուսիսից և հարավից շրջապատելու մեջ»,- ընդգծել է նա:


Քարտերի խոսքով՝ բաց մնացած ուղղությունը կարևոր է նրա համար, որ մարդիկ «կարողանան լքել իրենց տները և օգնություն ստանան ՄԱԿ-ի և այլ կազմակերպությունների կողմից»:


«Հնարավոր է, որ ԻՊ-ի գրոհայինները փախել են Սիրիայի ուղղությամբ… Մենք նրանց կոչնչացնենք Սիրիայում»,- ասել է նախարարը:


Ավելի վաղ հաղորդվել էր, որ «Իսլամական պետություն» ահաբեկչական խմբավորման առաջնորդ Աբու Բաքր ալ Բաղդադին կոչ է արել իրաքյան Մոսուլում գտնվող գրոհայիններին, ինչպես նաև տեղաբնակներին չլքել քաղաքն ու դիմակայել իրաքյան զորքերին:


Իր հղած ձայնագրությունում Ալ Բաղդադին կոչ է արել Մոսուլի բնակիչներին պայքարել «թշնամիների դեմ», իսկ ԻՊ գրոհայիններին՝ «անհավատների համար գիշերը ցերեկ դարձնել, նրանց հողերում քաոս ստեղծել ու այնպես անել, որ նրանց արյունը գետերով հոսի»: