Չենք շտապում ընդլայնվել. ՇՀԿ գլխավոր քարտուղարը կազմակերպությանը Թուրքիայի միանալու մասին

10:27 • 23.11.16

Շանհայի համագործակցության կազմակերպությունը չունի արագ ընդլայնվելու նպատակ: Այդ մասին հայտարարել է միավորման գլխավոր քարտուղար Ռաշիդ Ալիմովը՝ մեկնաբանելով ՇՀԿ-ին Թուրքիայի միանալու հնարավորությունը: Ընդ որում՝ նա նշել է, որ կազմակերպությանը միանալ ցանկացողների թվում են նաև Սիրիան և Ուկրաինան, գրում է «ՌԻԱ Նովոստի»-ն:


ՄԱԿ-ում պատասխանելով ՇՀԿ-ին Անկարայի միանալու հեռանկարների մասին լրագրողների հարցերին ՝ Ալիմովը նշել է, որ «Թուրքիան երկխոսության մեջ գտնվող գործընկեր է»:


«Մենք չենք շտապում ընդլայնվել: Այժմ քայլը քայլի հետևից, պարտավորությունների մասին հուշագրի համապատասխան, աշխատում ենք Հնդկաստանի և Պակիստանի հետ: Մենք կավարտենք այդ գործընթացը, այնուհետև կտեսնենք, թե ինչպես է դա աշխատելու: Մենք հանգիստ գնում ենք մեր ճանապարհով: Մենք մեր ծրագիրն ունենք, և մենք այն իրականացնում ենք»,- հայտարարել է Ալիմովը:


Ավելի վաղ Թուրքիայի նախագահ Ռեջեփ Թայիփ Էրդողանը հայտարարել էր, որ ԵՄ-ին անդամակցությունը երկրի համար միակ տարբերակը չէ, Անկարան քննարկում է ՇՀԿ-ին անդամակցության հարցը Ռուսաստանի և Ղազախստանի նախագահներ Վլադիմիր Պուտինի և Նուրսուլթան Նազարբաևի հետ միասին:


Հիշեցնենք, որ 2001 թվականին հիմնված ՇՀԿ-ի անդամներ են Ռուսաստանը, Չինաստանը, Ղազախստանը, Ղրղզստանը, Տաջիկստանը, Ուզբեկստանը և այլն։ Երկխոսության մեջ գտնվող գործընկեր երկրներն են Հայաստանը, Ադրբեջանը, Կամբոջան, Նեպալը, Թուրքիան և Շրի Լանկան: