Թուրքիան երբեք ՆԱՏՕ-ի միասնության դեմ քայլեր չի ձեռնարկի. Սթոլթենբերգ

10:07 • 23.11.16

Թուրքիան երբեք չի ձեռնարկի քայլեր, որոնք կարող են խախտել ՆԱՏՕ-ի հավաքական անվտանգությունը և միասնությունը: Այդ մասին հայտարարել է ՆԱՏՕ-ի գլխավոր քարտուղար Յենս Սթոլթենբերգը, հայտնում է «ՌԻԱ Նովոստի»-ն:


Ավելի վաղ Թուրքիայի նախագահ Ռեջեփ Թայիփ Էրդողանը հայտարարել էր, որ Թուրքիան, սկսած սառը պատերազմի ժամանակներից, դարձել է ՆԱՏՕ-ի անբաժանելի մասն ու շարունակում է դաշինքի գործունեությանը քաղաքական և ռազմական աջակցություն ցուցաբերել:


«ՆԱՏՕ-ի ուժը և հաջողությունը հիմնվում է այն փաստի վրա, որ ՆԱՏՕ-ի անդամներից մեկի վրա հարձակման դեպքում կառաջանա բոլոր դաշնակիցների արձագանքը: Եվ ես լիովին վստահ եմ, որ Թուրքիան երբեք չի անի մի բան, որը կխախտի այդ հավաքական պաշտպանությունը, ՆԱՏՕ-ի պայմանագրի 5-րդ հոդվածը և դաշինքի միասնությունը»,- հայտարարել է Սթոլթենբերգը «Հյուրիյեթ» թերթին տված հարցազրույցում:


Խոսելով մեծ և միջին հեռահարության Ս-400 զենիթահրթիռային համակարգերի գնման շուրջ Թուրքիայի և Ռուսաստանի միջև բանակցությունների մասին՝ Սթոլթենբերգը նշել է, որ դա յուրաքանչյուր երկրի գործն է՝ որոշել, թե ինչ ռազմական տեխնիկա ձեռք բերել: «Բայց մենք միշտ կենտրոնանում ենք ՆԱՏՕ-ի բոլոր անդամների հետ այդ տեխնիկայի փոխգործունեության վրա»,- նշել է գլխավոր քարտուղարը:


Ավելի վաղ հաղորդվել է, որ Թուրքիան բանակցություններ է վարում Ռուսաստանի հետ մեծ և միջին հեռահարության Ս-400 (С-400) զենիթահրթիռային համակարգերի գնման վերաբերյալ: 


«Հուսով ենք, որ ՆԱՏՕ-ի անդամ երկրները լուրջ կվերաբերեն դրան, և մեր համակարգը համատեղելի կլինի դաշինքի պահանջների հետ: Բայց մենք ոչ մի դեպքում չենք մերժում Ռուսաստանի առաջարկը և ակտիվ աշխատում ենք այդ ուղղությամբ: Մեր վերջնական նպատակն այդ համակարգերը մեզ մոտ արտադրելն է»,- ասել է Թուրքիայի պաշտպանության նախարար Ֆիքրի Ըշըքը: