Ղազախստանում իշխանությունը ժառանգաբար չի փոխանցվելու. Նազարբաև

10:46 • 25.11.16

Ղազախստանում իշխանությունը ժառանգաբար չի փոխանցվելու, միայն՝ Սահմանադրության համաձայն: Այդ մասին հայտարարել է Ղազախստանի նախագահ Նուրսուլթան Նազարբաևը Bloomberg գործակալությանը տված հարցազրույցում, գրում է «Независимая Газета»-ն:


Նա նշել է, որ մտադիր չէ իր երեխաներին պետական բարձր պաշտոնի նշանակել: Նրա խոսքով՝ իշխանության փոխանցման կարգն ամրագրված է Ղազախստանի Հանրապետության սահմանադրությունում և կիրականացվի երկրի հիմնական օրենքի համապատասխան:


«Իմ երեխաներին ժառանգելը չեմ նախատեսում: Ես կարծում եմ, որ դա մեզ համար չէ: Մեր իշխանության փոխանցումն ամրագրված է Սահմանադրությունում»,- ասել է Նազարբաևը՝ ընդգծելով, որ «լի է ուժով և էներգիայով»: Նա խոստացել է աշխատել մինչև 2020 թվականը:


Այնուամենայնիվ, փորձագետները վստահ են, որ Նազարբաևը համակարգը պատրաստում է իշխանության փոխանցման: Հենց այդ նպատակով են երկրում պարբերաբար իրականացվում կադրային տեղափոխություններ: Այդ «շախմատի տախտակի» վրա կենտրոնական գործիչներից մեկը Դարիգա Նազարբաևան է: Նա նախկինում աշխատել է խորհրդարանում, որտեղ հեղինակել է «Նվազագույն սոցիալական ստանդարտների մասին» օրենքի նախագիծը, որն արմատապես փոխում է սոցիալական ապահովման, բժշկության և կրթության ղազախական համակարգը: Այնուհետև նա զբաղեցրել է փոխվարչապետի պաշտոնը, այս տարվա սպետեմբերից զբաղեցնում է խորհրդարանում միջազգային հարաբերությունների, պաշտպանության և անվտանգության հարցերով հանձնաժողովի նախագահի պաշտոնը: Փորձագետները չեն բացառում, որ մոտ ապագայում նա կարող է զբաղեցնել խորհրդարանի վերին պալատի խոսնակի պաշտոնը, որը Սահմանադրության համաձայն առաջնային իրավունք ունի կատարելու նախագահի պարտականությունները երկրի նախագահի վաղաժամ հրաժարականի դեպքում: