Ինչքան անօրինականություն կա, դարձնում են օրինական. Ա. Մարտիրոսյանը պատգամավորի լիազորագրով ուրիշի փոխարեն քվեարկելու մասին

22:51 • 29.11.16

«Ժառանգություն» կուսակցության փոխնախագահ Արմեն Մարտիրոսյանը «ԱԺ կանոնակարգ-օրենքի» այն փոփոխությունից, որը թույլ է տալու պատգամավորի լիազորագրով մեկ ուրիշի փոխարեն քվեարկել, տպավորություն ունի, որ ինչքան անօրինական բան կա, փորձում են օրինականացնել:

«Քանի որ այս տարիների ընթացքում մեր հանրապետական գործընկերները շատ-շատ են աշխատել, շատ են հոգնել ու չեն կարող գալ խորհրդարան, դրա համար լիազորագիրը պետք է, ու բոլորը բոլորի լիազորագիրը կունենան»,-այս օրինագծի կապակցությամբ հեգնանքով ասաց պատգամավորը։ 

«Քանի որ շատ պատգամավորներ չեն գալիս խորհրդարան, ու նրանց գործընկերները նրանց փոխարեն ստիպված են լինում կրկնաքվեարկել, հիմա այս ապօրինությունը փորձում են օրինականացնել»,-հավելեց նա։

«Ժառանգության» փոխնախագահը նկատեց, որ քվեարկությունն անհատական որոշումների ու ներքին համոզվածության հիման վրա պետք է լինի: