Գրիգորի Մարգարյանը դեռ չի  որոշել` մասնակցելո՞ւ է ԱԺ ընտրություններին. որոշելու դեպքում հնարավոր է առաջադրվի խնամու՝ Սամվել Ալեքսանյանի տեղամասում

20:31 • 30.11.16

Tert. am-ից հետ զրույցում Շենգավիթից ընտրակարգով ընտրված, ներկայումս անկուսակցական  Գրիգորի Մարգարյանն անդրադառնում է  2017–ի ընտրություններին իր` ինչ-որ կուսակցության ցուցակով ռեյտինգային պատգամավոր դառնալու հեռանկարին:   

-Պարոն Մարգարյան, որոշե՞լ եք` որ կուսակցության ցուցակով եք ընդգրկվելու որպես  ռեյտինգային պատգամավոր:

- Ոչ, չեմ որոշել: 

- Բայց ընտրությունը կատարվելու է ՀՀԿ-ի ու ԲՀԿ –ի՞ միջև:

-Դե որ չեմ որոշել, դա էլ չեմ որոշել: 

-Իսկ հնարավո՞ր է, որ ընտրություններին չմասնակցեք:

- Դա էլ չեմ որոշել`մասնակցելու եմ, թե ոչ:

-Իսկ ի՞նչ է` հոգնե՞լ եք:

-Չէ, ինչու եմ հոգնել:

-Ամեն դեպքում` ավելի շատ  հակված եք մասնակցելո՞ւ, թե՞ ոչ:

- 50/50:  Ես այս որոշումը կկայացնեմ փետրվարի սկզբին:

-Բայց ռեյտինգայինով չէ՞: Այսինքն` կուսակցական չեք դառնա:

-Իհարկե, ռեյտինգայինով, միանշանակ:

- Իսկ հնարավո՞ր  է, որ «Հայկական վերածնունդ» կուսակցության ռեյտինգային պատգամավորը դառնաք:

- «Հայկական վերածնունդը» ո՞վ էր:

-  Արթուր Բաղդասարյանը՝ Ձեր նախկին կուսակցության` «Օրինաց երկրի» ղեկավարը:

-100 տոկոսով՝ ոչ:

- Ընդդիմություն ներկայացնելու տարբերակը ընդհանրապե՞ս բացառվում է:

- Ես 14  տարի է` պատգամավոր եմ, միշտ ասել եմ, որ ես ընդդիմություն չեմ, ես իշխանության թևի ներկայացուցիչ եմ:

-Իսկ եթե որոշում կայացնեք մասնակցել, ռեյտինգային կառաջադրվեք այն տեղամասից, որտեղից մշտապես ընտրվե՞լ եք:

-Այո: 

-Եթե չեմ սխալվում` Շենգավիթն ու Մալաթիա Սեբաստիան միացել են իրար, ու եթե պարզվի, որ այնտեղից լինելու է Սամվել Ալեքսանյանը, այս դեպքում մրցակցությունն անիմաստ չե՞ք համարում:

- Եթե Ալեքսանյան Սամվելի մասին է խոսքը, ինքն իմ խնամին է:

-Այսինքն` այդտեղ կաշխատի խնամիությա՞ն գործոնը:

-Խնամիության գործոնը կաշխատի հօգուտ ինձ էլ, իրեն էլ:

-Բայց ինչպե՞ս, մեկնումեկը պետք է զիջի, չէ՞:

-Իսկ ո՞վ ասաց, որ այդ տարածքում մեկ պատգամավոր է լինելու:

-Այսինքն` իրար կփորձեք օգնե՞լ:

-Եթե որոշեմ, այո, իհարկե:

-ՀՀԿ համագումարին հրավիրվա՞ծ էիք:

-Ոչ:

- Չեք ափսոսու՞մ: 

- Ճիշտն ասած`տենց հատուկ չեմ մտածել այդ մասին:

- 7000 անձ առաջադրվեց, Ձեզ առաջարկ չեղա՞վ:

-Եթե ես ուզենայի անդամագրվել, կանդամագրվեի 14 տարի առաջ: 2007-ից հետո էլ 5 տարի եղել եմ ՀՀԿ ֆրակցիայի անդամ: Հիմա ի՞նչ, պետք է նստեի, 15 տարի սպասեի, տեսնեի` ո՞վ է անդամագրվում ՀՀԿ-ին, որ դա ինձ դրդեր անդամագրվել: Անկուսակցական մնալն իմ համար սկզբունքային է, բայց ողջունում եմ բոլորին, ովքեր որոշել են ինտեգրվել այդ մեծ ընտանիքին:

-Նաև մեկնաբանություններ կային, որ իրենց կամքով չեն որոշել:

-Ես , ճիշտն ասած, չեմ մտածում, որ կարելի է միանգամից 7000 հոգու կամքը ոտնահարել, կոտրել: Դա մարդկանց մեծ բանակ է, հնարավոր չէ:

-Այսինքն`  ամեն ինչ մարդիկ անում են իրենց սեփական կամքով:

-Իհարկե: Ամեն ինչ չէ, բայց, մեծամասամբ` այո: