Պաբլո Էսկոբարի որդին ասել է, որ հայրը ոչ թե սպանվել է, այլ ինքնասպան է եղել (լուսանկարներ)
20-րդ դարի ամենահայտնի նարկոբարոններից մեկի՝ Պաբլո Էսկոբարի որդին SunOnline-ին տված հարցազրույցում գաղտնազերծել է, որ իր հայրն իրականում չի սպանվել Կոլումբիայի ոստիկանության իրականացրած հատուկ գործողության ժամանակ, այլ ինքնասպան է եղել:
Սեբաստիան Մարոքին անունով ներկայացող տղամարդը մանրամասնել է, որ հոր մահից 10 րոպե առաջ զրուցել է նրա հետ ու համոզված է, որ Էսկոբարը, չցանկանալով հանձնվել իրավապահ մարմիններին, կյանքին վերջ տալու որոշում է կայացրել:
Հայտնի է, որ Մարոքինն այն ժամանակ եղել է 17 տարեկան (նրա հայրը մահացել է 1993թ., Մեդելինում):
Էսկոբար ազգանունից միտումնավոր հրաժարված որդին նաև հավելել է, որ իշխանությունները դիահերձումն իրականացրած մասնագետներին ստիպել են արձանագրել, որ նարկոբարոնը սպանվել է:
«Հայրս միշտ էլ ասում էր, որ կյանքին վերջ է տալու ինքնասպանությամբ»,-նշել է 39-ամյա Մարոքինը՝ հավելելով, որ հպարտանում է ոչ թե հոր գործած հանցանքներով, այլ այն սիրով, որն Էսկոբարը տվել է իր ընտանիքին:














