Մոսկվա-Կալինինգրադ գնացքից 16 թունավորված դեռահասների են հոսպիտալացրել

21:46 • 03.12.16

Ռուսաստանի Սմոլենսկ քաղաքում հոսպիտալացրել են 16 դեռահասների, որոնք երթևեկում էին Մոսկվա-Կալինինգրադ երթուղով ընթացքող գնացքով: Այս մասին հայտնում է Lenta.ru-ն` մեջբերելով Մոսկովյան միջտարածաշրջանային տրանսպորտային քննչական վարչության հաղորդագրությունը:

Վարչության տվյալներով` 11-17 տարեկան երեխաներին տեղափոխել են քաղաքի հիվանդանոցներից մեկի ինֆեկցիոն բաժանմունք: Նրանց մոտ սուր աղիքային վարակի ախտանիշեր են հայտնաբերվել: Եվս 5 դեռահասների որոշել են չհոսպիտալացնել:

79 մարդկանցից կազմված խմբում երեխաները վերադառնալիս են եղել մայրաքաղաքում անցկացված էքսկուրսիայից: Նրանք բոլորն ապրում և սովորում են Կալինինգրադում:

Տրանսպորտային վարչությունը միջադեպի առնչությամբ նախաքննություն է սկսել: