Մեքսիկայի սենատը հավանություն է տվել բժշկական նպատակներով մարիխուանայի օգտագործման օրինականացմանը
Մեքսիկայի Սենատը ձայների մեծամասնությամբ հավանություն է տվել բժշկական նպատակներով մարիխուանայի օգտագործման օրինականացմանը, ինչի մասին հայտնում է gazeta.ru-ն:
«Ձայների 81 կողմ և 2 դեմ հարաբերակցությամբ հավանություն է տրվել մարիխուանայի օգտագործման վերաբերյալ որոշմանը»,-նշվում է երկրի խորհրդարանի վերին պալատի տարածած հայտարարությունում:
Աղբյուրը մանրամասնում է, որ այժմ մարիխուանայի օգտագործման օրինականացման հարցը պետք է քննարկման դրվի խորհրդարանի ստորին պալատում:
Նշենք, որ ավելի վաղ Մեխիկոյի արքեպիսկոպոս Նորբերտո Ռիվերան հայտարարել էր, որ երկրի կաթոլիկ եկեղեցին դեմ չէ բժշկական նպատակներով մարիխուանայի օգտագործմանը:
Հայտնի է, որ Մեքսիկայի իշխանությունները թույլ են տալիս մարիխուանա աճեցնել անձնական նպատակներով, սակայն օրենքն արգելում է այն օգտագործել երեխաների կամ նրանց ներկայությամբ, ովքեր դրա համար իրենց համաձայնությունը չեն տվել:










