Սաակաշվիլին Պորոշենկոյին համեմատել է թուրքմենբաշու հետ
Ուկրաինայի Օդեսա շրջանի նախկին նահանգապետ Միխեիլ Սաակաշվիլին երկրի նախագահ Պյոտր Պորոշենկոյին համեմատել է Թուրքմենստանի նախկին առաջնորդ Սափարմուրատ Նիյազովի հետ, որը կրում էր «թուրքմենբաշի» տիտղոսը: Այդկերպ Սաակաշվիլին մեկնաբանել է ուկրաինական ԶԼՄ-ներում գրաքննության հետ կապված իրավիճակը, գրում է lenta.ru-ն:
Նախկին նահանգապետը բողոքել է, որ վերջին շրջանում նրան չեն հրավիրում եթեր: «Նման բան տեղի է ունենում Թուրքմենստանում, որտեղ թուրքմենբաշի կար, որն այլընտրանքային իրականություն էր ստեղծել: «Եթե մարդը հեռուստացույցում չկա, ուրեմն մարդը չկա»: Բայց, կներեք, մեզ մոտ Պորոշենկո՞ն է, թե՞ թուրքմենբաշին: Մեզ մոտ հետմայդանյան Ուկրաինա՞ է, թե՞ Թուրքմենստան»,- ասել է Սաակաշվիլին:
Նա նաև ընդգծել է, որ ուկրաինական հեռուստաալիքները «մեկ օրվա մեջ կորցրել են իրենց հետաքրքրությունն իմ հանդեպ»:
Հիշեցնենք, որ 2016 թվականի նոյեմբերի 7-ին Սաակաշվիլին հայտարարել է Օդեսայի նահանգապետի պաշտոնից հեռանալու մասին: Նա որպես պատճառ է նշել իշխանությունների կողմից կոռուպցիայի դեմ արդյունավետ պայքարի բացակայությունը: նոյեմբերի 9-ին Ուկրաինայի նախագահ Պյոտր Պորոշենկոն ազատել է Սաակաշվիլիին Օդեսայի նահանգապետի պաշտոնից: Նա Օդեսայի նահանգապետ էր նշանակվել 2015 թվականի մայիսի 30-ին:
Նոյեմբերի 19-ին Սաակաշվիլին հայտնել է «Рух новых сил» քաղաքական շարժման ստեղծման մասին:
Դեկտեմբերի 2-ին Օդեսայի շրջանի նախկին նահանգապետը հայտարարել է Ուկրաինայում իր ստեղծած «Рух новых сил» («Նոր ուժերի շարժում») կուսակցության համար դրամահավաք սկսելու մասին: Նա ընդգծել է, որ ինքը և իր աջակիցները մտադիր են օլիգարխներին հեռացնել ժողովրդի համար կարևոր որոշումների կայացումից:










