Մենք սրան սպասել ենք 5 տարի. հալեպցիները տոնում են քաղաքի՝ գրոհայիններից վերջնական մաքրումը (տեսանյութեր, լուսանկարներ)
Հալեպը ցնծում է զինված գրոհայինների վերջին խմբի տարհանման առիթով, Հալեպի ամբողջովին ազատագրված լինելու մասին պատմական լուրն այլևս պաշտոնական է և հաստատված Սիրիայի բանակի հրամանատարության կողմից:
Նշենք, որ նախօրեին ուշ երեկոյան Սիրիայի բանակի հրամանատարությունը պաշտոնական հաղորդագրությամբ հաստատել է Սիրիայի տնտեսական կենտրոն Հալեպից զինված գրոհայինների վերջին խմբի դուրսբերման մասին լուրը: Սիրիական բանակի հրամանատարությունը Հալեպը հայտարարել է ահաբեկչությունից և ահաբեկիչներից ամբողջովին մաքրված և ապահով տարածք: 
Հիշեցնենք, որ դեկտեմբերի 12-ին Սիրիայի պետական պաշտոնական աղբյուրները հաստատել են Հալեպ քաղաքի ամբողջական ազատագրումը։
Ինչպես հաղորդում է Հալեպի հայկական «Գանձասար» պարբերականը՝ բանակի հրամանատարությունը շեշտել է, որ Հալեպում անվտանգության և ապահովության հաստատումը ռազմավարական մեծ շրջադարձ է և առանցքային նշանակություն ունի ահաբեկչության դեմ պայքարի հարցում, ինչպես նաև մահացու հարված է ահաբեկչությանն աջակցող երկրներին: 


Հալեպի բնակիչները դուրս են եկել փողոցներ, գրկախառնվել և տոնել են վերջնական հաղթանակը, նրանց չի խանգարել անգամ անձրևոտ եղանակն ու սաստիկ քամին, գրում է ռուսական «ՌԻԱ Նովոստի» (РИА Новости) գործակալությունն ու հավելում. «Այսօր՝ անցնող 5 տարվա ընթացքում առաջին անգամ, Հալեպում մարդիկ կրակում են օդ, այլ ոչ թե միմյանց վրա»:
«Ես կարծում էի, որ այս օրը երբեք չի գա: Մենք սրան սպասել ենք 5 տարի»,- ասել է Հալեպի բնակչուհիներից մեկը գործակալության թղթակցի հետ զրույցում: 










