Ռեյգանը դագաղում ոչ թե կշրջվեր, այլ կուրախանար, որ իր կուսակցության ներկայացուցիչներն ամեն տեղ հաղթում են. Պուտին

14:41 • 23.12.16

ԱՄՆ նախկին նախագահ, հանրապետական Ռոնալդ Ռեյգանը կուրախանար, որ իր կուսակցության ներկայացուցիչներն ամեն տեղ հաղթում են, կուրախանար նաև ընտրված նախագահի համար: Այդ մասին հայտարարել է Ռուսաստանի նախագահ Վլադիմիր Պուտինը մեծ ասուլիսի ժամանակ:


«Հանրապետական ընտրողների 37 տոկոսը համակրում է Ձեզ, և եթե Ռոնալդ Ռեյգանն իմանար, նա շուռ կգար դագաղում»,- «Ռոսիա 24»-ի լրագրողը փոխանցել է ԱՄՆ գործող նախագահ Բարաք Օբամայի խոսքերն ու փորձել իմանալ Պուտինի կարծիքն այդ մասին:


«Ռեյգանն, ինձ թվում է, կուրախանար, որ իր կուսակցության ներկայացուցիչներն ամեն տեղ հաղթում են, և ավելի կուրախանար ընտրված նախագահի համար, ով շատ լավ զգաց հասարակության տրամադրությունները, աշխատեց այդ ուղղությամբ և գնաց մինչև վերջ: Եվ արդյունքում հաղթեց, չնայած ոչ ոք, մեզանից բացի, չէր հավատում, որ նա կհաղթի»,- ասել է Պուտինը:


Հիշեցնենք, որ Միացյալ Նահանգների գործող նախագահ Բարաք Օբաման հայտարարել էր, որ ԱՄՆ նախկին նախագահ, հանրապետական Ռոնալդ Ռեյգանը դագաղում կշրջվեր, եթե իմանար՝ իր աջակիցներից որքան մարդ է աջակցում ՌԴ նախագահ Վլադիմիր Պուտինին:


«Ընտրություններից հետո կատարվել է ուսումնասիրություն, որի ժամանակ մենք տեսանք, որ հանրապետական ընտրողների 37 տոկոսն աջակցում է Պուտինին։ Հանրապետական ընտրողների ավելի քան մեկ երրորդն աջակցում է Պուտինին՝ Պետանվտանգության կոմիտեի նախկին գործակալին։ Ռոնալդ Ռեյգանը կարող էր շրջվել դագաղում»,- ասել էր Օբաման Վաշինգտոնում տված մամուլի ասուլիսի ժամանակ։