Ճապոնիայում 6.000 մարդ երկու գիշեր անցկացրել է օդանավակայանում՝ ձյան պատճառով

13:23 • 24.12.16

Վեց հազար մարդ ստիպված է եղել հինգշաբթի օրվանից մնալ ճապոնական Հոկայդո կղզու «Նոր Տիտոսե» օդանավակայանում՝ ձյան ու սաստիկ քամու պատճառով: Այս մասին հաղորդում է РИА Новости-ն` հղում անելով տեղական լրատվամիջոցներին:

Աղբյուրը մանրամասնում է, որ ուրբաթ Սապորո քաղաքում 96 սանտիմետր ձյուն է տեղացել. 1966 թվականից առաջին անգամ տեղումների քանակը դեկտեմբերին գերազանցել է 90 սանտիմետրը: «Նոր Տիտոսե» օդանավակայանում հետաձգվել է ընդհանուր առմամբ 287 չվերթ:

Եղանակային վատ պայմանները խոչընդոտել են նաև ցամաքային տրանսպորտի աշխատանքը` չեղարկվել է 262 էլեկտրագնացքի երթուղին, ինչի պատճառով ուղևորները ստիպված են եղել երկու գիշեր անցկացնել օդանավակայանում:

«Օդանավակայանում չեն հերիքել վերմակներն ու տաք շորերը: Ղեկավարությունը դիմել է ինքնապաշտպանության ուժերի օգնությանը, և օդանավակայան են բերվել վերմակներ ու քնապարկեր», - հայտնել է աղբյուրը:

Նշվում է, որ շաբաթ օրն առավոտյան վերսկսվել է ավիահաղորդակցությունը, իսկ վերգետնյա տրանսպորտի վերականգնման համար ժամանակ է պահանջվում, որպեսզի երկաթուղիները մաքրվեն ձնից: