Ամերիկացուն տուգանել են «կոֆեինի ազդեցության տակ» մեքենա վարելու համար

23:35 • 28.12.16

Կալիֆոռնիայի բնակիչ Ժոզեֆ Շվաբային տուգանել են ոչ սթափ վիճակում մեքենա վարելու համար, թեև փորձաքննության արդյունքները ալկոհոլի կամ թմրամիջոցների առկայություն ցույց չեն տվել:

Ինչպես հաղորդում է Motor.ru-ն, տղամարդու արյան մեջ օտար նյութերից միայն կոֆեին է հայտնաբերվել, սակայն մեղադրանքը նրա նկատմամբ չի հանվել: Նրա փաստաբանի խոսքով` մեկ տարի առաջ 36-ամյա Շվաբային կանգնեցրել է ալկոհոլային խմիչքների շրջանառությունը կարգավորող վարչության աշխատակցուհին` պնդելով, որ վերջինս ոչ ադեկվատ էր վարում մեքենան:

Ալկոհոլի օգտագործումը ստուգող թեստը բացասական արդյունք է ցույց տվել, որից հետո տղամարդուն բուժհետազոտության են ուղարկել, սակայն բուժզնման արդյունքում ևս ոչինչ չի հայտնաբերվել: Այնուամենայնիվ ամերիկացուն մեղադրել են թմրամիջոցների ազդեցության ներքո վարելու համար:

Կալիֆոռնիայի օրենսդրության համաձայն «թմրանյութերի» տակ հասկացվում է ցանկացած տեսակի նյութ ալկոհոլից բացի, որը կարող է բացասաբար ազդել մեքենա վարելու կարողության վրա:

Մեկ տարի անց էլ ամերիկացու նկատմամբ պատժամիջոցներ չեն կիրառվել, սակայն մեղադրանքը նույնպես չի հանվել: Շվաբան մտադիր է դատարան դիմել: