Թալիշցի 20 տղամարդ ու նաև նրանցից մեկի ընտանիքը վերադարձել են Թալիշ՝ Նոր տարին  այնտեղ դիմավորելու

21:11 • 30.12.16

Ապրիլյան պատերազմից հետո Հայաստան «գաղթած» Պետրոս Աբրահամյանը, որն ընտանիքին թողել էր Չարենցավանում, մի քանի թալիշցի տղամարդկանց հետ վերադարձել  հարազատ գյուղ, Նոր տարին պատրաստվում է ընտանիքի հետ դիմավորել Թալիշում:

« Ընտանիքս երեկ եմ բերել: Նոր տարին Թալիշ ենք նշելու: Ավելի  հետաքրքիր` մեր տանը»,- Tert.am-ի հետ զրույցում ասաց Պետրոս Աբրահամյանը:

Վերջինս այն 10 տղամարդկանց թվում էր, որոնք ներգրավված են Թալիշի վերականգման աշխատանքներին։

Նա Tert.am-ին տեղեկացրեց, որ նման մարդկանց թիվն ավելացել է`«մի 20 ջահել կլինի»:

Առաքելյանների ընտանիքը առաջին անգամ Ամանորը նշելու է Թալիշից դուրս:  Արմինեի ամուսինը, տեգր ու սկեսրայրը Մատաղիսում են մնացել, իսկ Հայաստանում բնակվում են Արմինեն իր 3 երեխաներով ու տեգոր ընտանիքը` ևս 3 երեխաներով:

«Գալու են դիմավորելու, նորից գնան: Մենք շատ կուզեինք այնտեղ լինել, բայց այնտեղ երեխա տանելու չէ»,-  ասաց տիկին Արմինեն՝ հավելելով, որ, բնականաբար,շատ են տխուր:

«Այս Նոր տարուն  մաղթում եմ`  խաղաղություն աշխարհին, որ նման  դեպքեր այլևս չկրկնվեն»,-ասաց տիկին Արմինեն:

Ապրիլյան դեպքերի ժամանակ նրանք տեղափոխվել էին Չարենցավան, որտեղ ապրում էին վարձով, հիմա` Աբովյան, որտեղ բնակարան են գնել:

«Մենք ենք առել էդ տունը,  պետությունը  մեզ չի աջակցել»,-ասաց Արմինե Առաքելյանը: 

Օհանյանների ընտանիքը` երեք եղբայր, երկու հարս, պապիկ, մայր ու մեկ անչափահաս երեխայով ևս ապրում է Չարենացավանում: Tert.am –ի հետ զրույցում Ժորա Օհանյանն ասաց, որ տխուր են Նոր տարին Թալիշում չդիմավորելու համար։ 

«Ուրիշ մթնոլորտ, ուրիշ շրջապատ , ուրիշի տուն»,-պատմեց տղամարդը:

Օհանյանների ընտանիքը Թալիշում ունեցել է  անասուններ, մթերային խանութ, որն ամբողջությամբ թալանված է: 

Վերջիններիս Արցախի կառավարությունն ասել է, որ եթե վերադառնան, գուցե ինչ-որ փոխհատուցում կտան:

«Գյուղ դե տեսնանք` կվերադառնա՞նք , թե ոչ,  եթե պայմանները, անվտանգությունը երաշխավորեն, ինչու ոչ, կվերադառնանք, բայց դե դժվար»,-ասում է Ժորա Օհանյանը: