Վրաստանի փոխվարչապետն ու «Գազպրոմի» ներկայացուցիչներն այսօր կհանդիպեն. Վրաստանը հնարավոր է զիջումների գնա

15:25 • 10.01.17

 

Վրաստանի փոխվարչապետ, Էրեգետիկայի նախարար Կախա Կալաձեն Մինսկ աշխատանքային այցի շրջանակներում այսօր կհանդիպի «Գազպրոմ» ընկերության  ղեկավարության ներկայացուցիչների հետ: Կողմերը կքննարկեն ռուսական գազի տարանցիկ մատակարարումների վճարման հարցում 2017 թվականի համագործակցությանը վերաբերող հարցեր:

Այս մասին հայտնում է Rustavi2.com-ը՝ հղում անելով Էներգետիկայի նախարարության մամուլի ծառայությանը:

Վրաստանը հնարավոր է զիջումների գնա բանակցությունների հարցում: Ռուսաստանը ցանկանում է Վրաստանի տարածքով գազի տարանցման համար գումարով վճարել, բայց վրացական կողմը ցանկանում է պահպանել վճարման նախկին ձևը՝ ստանալով Հայաստան ուղարկվող ռուսական «կապույտ վառելիքի» ընդհանուր ծավալի 10 տոկոսը:

Հիշեցնենք, որ Ռուսաստանից Վրաստանի տարածքով գազի տարանցման գործող պայմանագրի ժամկետը լրացել է դեկտեմբերի 31-ին: Բանակցությունների երկրորդ փուլը, ինչպես և առաջինը, ապարդյուն է անցել, քանի որ կողմերն այդպես էլ չեն կարողացել գալ համաձայնության: