ԱՄՆ-ում Թրամփի երդմնակալության արարողության կարգուկանոնի համար բայքերները պատրաստ են «մսից պատ կազմել»
Bikers For Trump բայքերների միության հիմնադիր Քրիս Քոքսը հայտարարել է, որ իր կազմակերպությունը պատրաստ է նորընտիր նախագահ Դոնալդ Թրամփի երդմնակալության ժամանակ կենդանի պատ կազմել քաղաքացիների անվտանգությունը ապահովելու համար, հաղորդում է Fox News-ը:
Քոքսի խոսքով՝ հազարավոր բայքերներ պատրաստվում են ժամանել Թրամփի երդմնակալությանը, որը պլանավորված է հունվարի 20-ին Վաշինգթոնում: Բայքերների ակցիան պլանավորված է ցանկացած տիպի միջադեպ կանխելու համար:
«Մենք կմասնակցենք երդմնակալությանը: Մենք մսից պատ կստեղծենք»,-ասել է Քոքսը Fox News-ի եթերում:
Հաղորդավարը խնդրել է, որ նա բացատրի, թե ինչ ի նկատի ունի ասելով՝ «մսից պատ կազմել»:
«Մենք ուս ուսի խիտ կկանգնենք և կդիմադրենք նրանց, ովքեր կփորձեն անցնել ոստիկանության պատնեշը»,- խոստացել է Քոքսը, նշելով, որ իր կազմակերպության բայքերներն այնուամենայնիվ խաղաղ երդմնակալության արարողություն են ակնկալում:










