Գորբաչովը Վիլնյուսում 1991 թվականի հունվարի 13-ի դեպքերի գործով ծանուցագիր է ստացել

16:37 • 19.01.17

Վիլնյուսի շրջանային դատարանը ԽՍՀՄ նախկին նախագահ Միխայիլ Գորբաչովին ծանուցագիր է ուղարկել Վիլնյուսում 1991 թվականի հունվարի 13-ի իրադարձությունների գործով, երբ հեռուստաաշտարակի մոտ տեղի ունեցած բախումների ժամանակ 14 մարդ էր զոհվել: Այդ մասին հայտնել է դատավոր Այնորա Կորնելիա Մացյավիչենեն BNS գործակալությանը տված հարցազրույցում, գրում է «ՌԻԱ Նովոստի»-ն:


Դատավորի խոսքով՝ ծանուցագիրն ուղարկվել է փոստով՝ Գորբաչովի հիմնադրամի հասցեով: Հասցեատերն այն ստացել է դեկտեմբերի 28-ին:


Ծանուցագրում ասվում է, որ Գորբաչովը կարող է ցուցմունքներ տալ տեսակոնֆերանսի ձևաչափով:


2016 թվականի հոկտեմբերին Վիլնյուսի շրջանային դատարանը որոշում է կայացրել հարցաքննել նախկին նախագահին որպես վկա:


1990 թվականի մարտի 11-ին Լիտվայի գերագույն խորհուրդը հայտարարել է հանրապետության անկախության վերականգնման մասին, բայց ԽՍՀՄ իշխանություններն այդ որոշումը հակասահմանադրական են համարել: 1991 թվականի հունվարին Լիտվայում չարտոնված բողոքի ցույցեր են սկսվել, ինչի հետո հանրապետություն են բերվել հատուկ ստորաբաժանումների մարտիկներ և օդադեսանտային զորքեր, որոնք զբաղեցրել են մի շարք ռազմավարական օբյեկտներ: