Դունյա Միատովիչը Թուրքիային կոչ է արել արդարություն հաստատել Դինքի սպանության հարցում

17:18 • 19.01.17

Թուրքիայի իշխանությունները պետք է ինտենսիվացնեն իրենց ջանքերը գտնելու համար հայտնի պոլսահայ լրագրող Հրանտ Դինքի սպանության հեղինակներին: Այդ մասին այսօր հայտարարել է ԶԼՄ-ների ազատության հարցերով ԵԱՀԿ ներկայացուցիչ Դունյա Միյատովիչը: Հայտարարության տեքստը տեղադրված է կազմակերպության կայքում:


«Ամեն տարի մենք հիշում ենք Հրանտ Դինքի սպանության տարելիցը՝ մեծարելով փոքրամասնությունների իրավունքների պաշտպանությանն ուղղված նրա խիզախ խոսքերը և հարգանքի տուրք մատուցելով խաղաղության ստեղծման ուղղությամբ նրա բացառիկ ջանքերին»,- ասել է ներկայացուցիչը: «Բայց մենք անում ենք դա՝ իմանալով, որ անգամ մեկ տասնամյակ անց այս ողբերգության հեղինակները դեռ ազատության մեջ են»,-հավելել է նա:


Հիշեցնենք, որ Հրանտ Դինքը սպանվել է 2007թ.-ի հունվարի 19-ին` Ստամբուլի Շիշլի թաղամասում գտնվող «Ակօս» թերթի խմբագրատան առջև` 16-ամյա թուրք ազգայնական Օգյուն Սամասթի կրակոցից: Հրանտ Դինքի սպանության վերաբերյալ դատավարությունը ձգվում է արդեն 10 տարի և դեռևս չի գտել իր հանգուցալուծումը: Ինչպես նշվում է հայտարարությունում, չնայած նրան սպանողը ձերբակալվել է և դատապարտվել 22 տարվա ազատազրկման, հանցագործության հեղինակների հայտնաբերմանն ուղղված հետաքննությունը դեռևս շարունակվում է:


«Ես կոչ եմ անում Թուրքիայի իշխանություններին ավելի շատ ջանք գործադրել արդարության հաստատման և Հրանտ Դինքի հարազատների ու ընտանիքի համար անպատասխան հարցերի տանջալից տասնամյակից հետո հանգուցալուծման երաշխավորման համար: Իշխանությունները պետք է ապահովեն հասարակությանն ուղղված կարևորագույն ուղերձը, որ լրագրողների դեմ բռնություն իրականացնողները չեն կարող անպատիժ մնալ»,- ասել է նա:


Ինչպես նշվում է հայտարարությունում, ներկայացուցիչը բազմիցս կոչ է արել ԵԱՀԿ անդամ երկրներին վերջ տալ լրագրողների դեմ բռնության և նրանց սպանության անպատժելիությանը:


Նշենք, որ Ստամբուլում անցկացվում է պոլսահայ լրագրող Հրանտ Դինքի մահվան 10-րդ տարելիցին նվիրված միջոցառումը:


Ստամբուլի Շիշլի թաղամասի Օսմանբեյ պողոտայում գտնվող «Ակօս»-ի նախկին խմբագրատան դիմաց, ուր ուղիղ 10 տարի առաջ սպանվեց Դինքը, հավաքվել են տասնյակ հազարավոր ակտիվիստներ Թուրքիայի բազմաթիվ քաղաքներից. հայեր, թուրքեր, քրդեր, ասորիներ և Թուրքիայում բնակվող բազմաթիվ այլ էթնիկ ու կրոնական խմբերի ներկայացուցիչներ:

Ներկաները բարձրացրել են «Հանուն Հրանտի, հանուն արդարության», «Բոլորս Հրանտ ենք, բոլորս հայ ենք», «Այստեղ ենք, ախպարիկ», «Կարոտում ենք, ախպարիկ», «Հրանտին մի՛ մոռացեք» գրություններով պաստառներ: