ՌԴ ՍԴ-ն թույլ է տվել չվճարել «ՅՈւԿՕՍ»-ի նախկին բաժնետերերին 1,9 միլիարդ եվրո փոխհատուցումը
Ռուսաստանի սահմանադրական դատարանը թույլ է տվել չվճարել «ՅՈւԿՕՍ» ընկերության նախկին բաժնետերերին 1,9 միլիարդ եվրո փոխհատուցումը, որը սահմանել է Մարդու իրավունքների եվրոպական դատարանը: Այդ մասին հայտնում է «ՌԻԱ Նովոստի»-ն:
«Ռուսաստանն իրավունք ունի հետ կանգնելու իր վրա դրված պարտավորություններից, եթե դա Սահմանադրությունը չխախտելու միակ միջոցն է»,- հայտարարել է Սահմանադրական դատարանի նախագահ Վալերի Զորկինը:
Նրա խոսքով՝ ռուսական և եվրոպական օրենսդրության փոխհարաբերությունները պետք է լինեն ոչ թե ստորադասվող, այլ կառուցվեն երկխոսության ձևով:
«Եվրոպական դատարանը պետք է հարգի ռուսական օրենսդրության ինքնիշխանությունը»,- ասված է որոշման մեջ:
Նշվում է, որ համաձայն գործող օրենսդրության՝ Ռուսաստանը պարտավոր չէ կատարել միջազգային դատարանների որոշումները, եթե դրանք հակասում են Սահմանադրությանը:
Մարդու իրավունքների եվրոպական դատարանը 2014 թվականին պարտավորեցրել է Ռուսաստանին փոխհատուցում վճարել «ՅՈւԿՕՍ»-ի նախկին բաժնետերերին դատական պաշտպանության և արդար դատավարության նրանց իրավունքները խախտելու համար: Ռուսաստանի արդարադատության նախարարությունը հայտարարել է, որ չի համարում այդ որոշումն արդարացի և անկողմնակալ և Սահմանադրական դատարան դիմում է ուղղել այն չկատարելու հնարավորության վերաբերյալ։










