Հերմինե Նաղդալյանը և Ղազախստանի դեսպանը քննարկել են տարածաշրջանում տիրող իրավիճակը

16:03 • 20.01.17

ՀՀ ԱԺ փոխնախագահ Հերմինե Նաղդալյանը հունվարի 20-ին հանդիպել է ՀՀ-ում Ղազախստանի արտակարգ և լիազոր դեսպան Թիմուր Ուրազաևի հետ:

Հանդիպման ընթացքում կողմերն անդրադարձել են տարածաշրջանում տիրող իրավիճակին: Կարևորվել են կայունությունն ու խաղաղությունը տարածաշրջանում և  այդ ուղղությամբ երկու երկրների  քայլերը:

Այս համատեքստում ՀՀ ԱԺ փոխնախագահ Հերմինե Նաղդալյանը բարձր է գնահատել Ղազախստանի իշխանությունների որդեգրած դիրքորոշումը, մասնավորապես, Ղազախստանի նախագահ Նուրսուլթան Նազարբաևի կողմից առաջարկված «Խաղաղություն. 21-րդ դար» մանիֆեստը, որի նպատակն է արմատախիլ անել աշխարհում առկա պատերազմները: Հերմինե Նաղդալյանն ընդգծել է, որ տարածաշրջանի բոլոր երկրների համար մեծ է Ղազախստանի ներդրումը խաղաղության վերահաստատման գործում՝ Հարավային Կովկասում այսօր առկա ռազմական հռետորաբանությունը և սպառազինության մրցավազքը բացառելու համար:

Անդրադառնալով Լեռնային Ղարաբաղի հակամարտությանը՝ Ղազախստանի դեսպան Թիմուր Ուրազաևը իր հերթին ափսոսանք է հայտնել տարեսկզբից սահմանում տիրող լարվածության հետևանքով տեղի ունեցած կորուստների համար և ևս մեկ անգամ վերահաստատել Ղազախստանի դիրքորոշումը՝ կարգավորել հակամարտությունը միայն բանակցային ճանապարհով:

Հանդիպման ընթացքում կողմերն անդրադարձել են նաև միջազգային համագործակցության խնդիրներին, ԵԽԽՎ առաջիկա ձմեռային նստաշրջանին, ԵԽԽՎ-ի աշխատանքների առանձնահատկություններին:

Հանդիպմանը մասնակցել է նաև ՀՀ ԱԺ պատգամավոր, ԵԽԽՎ-ում հայկական պատվիրակության անդամ Նաիրա Կարապետյանը: