26-ամյա աղջկան սպանած տաքսու վարորդը ծախսած է եղել նրա գումարը
Արարատի մարզի Երասխավան գյուղի սկզբնամասում, ձորակի լանջին հունվարի 13-ին մահացած հայտնաբերված 26-ամյա Քրիստինե Արզումանյանի սպանության մեջ մեղադրվող վարորդը աղջկա սպանության դեպքի օրը գումարի հետ կապված վեճ է ունեցել նրա հետ։
Tert.am-ի տեղեկություններով՝ գործի նախաքննությամբ արդեն պարզվել է, որ տաքսու վարորդ, Կոտայքի մարզի Առինջ գյուղի 43-ամյա բնակիչ Գարեգին Եղիազարյանը աղջկան պետք է վիճակախաղի գումար փոխանցեր, սակայն ծախսել էր այն, ինչից էլ առաջացել էր վեճը:
Նշենք, որ դեպքի հետ կապված ի սկզբանե վարկած էր շրջանառվում այն մասին, որ վարորդն աղջկան պարտք է եղել 500 հազար դրամ գումար:
Հիշեցնենք, որ ՀՀ քննչական կոմիտեի Երևանի քննչական վարչության Շենգավիթ վարչական շրջանի քննչական բաժնում քննվող քրեական գործով պարզվել էր, որ սպանվածը ճանաչել էր նրան և հաճախակի օգտվել նրա ծառայություններից։ Բացի դրանից՝ մի քանի այլ անձանց հետ խաղացել են վիճակախաղ և դեպքի օրը տուժողը պետք է ստանար վիճակախաղի գումարը՝ 500.000 դրամ։
Դեկտեմբերի 27-ի երեկոյան աղջիկը խնդրել է ուղևորվել Սիսիան և վարորդը համաձայնել է կատարել փոխադրումը։ Ճանապարհին վիճակախաղի գումարի շուրջ առաջացել է վիճաբանություն, որի ժամանակ վարորդը հարվածել է աղջկան, ապա նաև ձեռքերով սեղմել նրա պարանոցը, որի հետևանքով վերջինս մահացել է։ Վարորդն այնուհետ աղջկա դիակը նետել է ձորակը։










