Սիլիկոնյան հովտի միլիարդատերերը ստորգետնյա բունկերներ են գնում՝ նախապատրաստվելով «ապոկալիպսիսին». The Independent

Բրիտանական The Independent պարբերականի փոխանցմամբ՝ տեղեկատվական տեխնոլոգիաների (ՏՏ) կենտրոն համարվող Սիլիկոնյան հովտի միլիարդատերերը ձեռք են բերում ստորգետնյա բունկերներ, զենքեր ու հատուկ փոխադրամիջոցներ՝ նախապատրաստվելով «ապոկալիպսիսին»:

Աղբյուրը մանրամասնում է, որ ՏՏ ոլորտի միլիարդատերերը չեն բացառում, որ արհեստական ուղեղն ու առաջադեմ տեխնոլոգիաները որոշ ժամանակ անց այնքան շատ մարդկանց գործազուրկ կդարձնեն, որ իրենց դեմ կարող է ապստամբություն սկսվել: Նրանք հավանական են համարում նաև այն տարբերակը, որ ռոբոտները կարող են դուրս գալ մարդկանց դեմ:

LinkedIn սոցցանցի համահիմնադիր Ռեյդ Հոֆմանի կարծիքով՝ Սիլիկոնյան հովտի միլիարդատերերի 50%-ը նախապատրաստվում է իրադարձությունների հետագա զարգացման վատագույն սցենարներին:

Նշվում է, որ աշխարհի խոշորագույն Facebook սոցկայքի ղեկավարության նախկին անդամ Անտոնիո Գարսիա Մարտինեսը 5 հա հող է գնել Խաղաղ օվկիանոսում գտնվող կղզիներից մեկում: Նա այնտեղ տուն է կառուցել՝ համալրված արևային մարտկոցներով, գեներատորներով, ինչպես նաև՝ զինանոցով: