Չինաստանում դիմավորել են Հրե աքաղաղի տարին (լուսանկարներ)
Այս գիշեր Չինաստանի բնակիչներն առյուծների ավանդական պարերով, տոնավաճառներով և թատերական ներկայացումներով դիմավորել են արևելյան օրացույցով Նոր տարին, որը խոստանում է բարենպաստ տարի լինել ընտանիքի ստեղծման համար։
Չինական աստղագուշակի համաձայն՝ այս տարվա հովանավոր կենդանին Հրե աքաղաղն է, որը խորհրդանշում է երիտասարդություն, ուժ, հույս և մաքրություն։
Ավանդության համաձայն՝ ամենամասշտաբային և տպավորիչ միջոցառումները կայացել են Չինաստանի մայրաքաղաքի հյուսիսում գտնվող Երկրի տաճարում։ Վաղ առավոտյան կայացել է «առյուծների պարը», որը պետք է վախեցնի բոլոր չար ուժերին, որոնք կարող են դժբախտություն բերել նոր տարում։
Նույն տաճարում է անցկացվում նաև Պեկինի ամենահայտնի, ամենամեծ ամանորյա տոնավաճառը, որտեղ կարելի է ձեռագործ տարբեր հուշանվերներ գնել և փորձել Չինաստանի տարբեր շրջանների խոհանոցը։ Հազարավոր կարմիր լապտերներով զարդարված տաճարի ուղղությամբ չի դադարում Չինաստանի մայրաքաղաքի բնակիչների և հյուրերի հոսքը։




















