Աշխարհում առաջին սերտիֆիկացված աերոտաքսին կսկսի ուղևորներ տեղափոխել արդեն հաջորդ տարի (լուսանկարներ)

Չնայած նրան, որ ցամաքային փոխադրամիջոցներն ամեն տարի է՛լ ավելի կատարյալ են դառնում, դա ոչ մի կերպ չի նպաստում ճանապարհային խցանումների խնդրի լուծմանը: Սակայն արդեն մոտ է այն օրը, երբ ֆանտաստիկ ֆիլմերը, որտեղ մարդիկ քաղաքում տեղաշարժվում են օդով, մարգարեական կդառնան, գրում է bigpicture.ru կայքը:

Գերմանական E-volo ինժեներական ընկերությունը հայտարարել է, որ արդեն հաջորդ տարի նրանց ստեղծած Volocopter 2X անվանումով սարքը կունենա սերիական արտադրություն և կդառնա աշխարհում առաջին սերտիֆիկացված աերոտաքսին:

Ուղևորատար դրոնների ոլորտում աշխատանքներ են իրականացնում միանգամից մի քանի ընկերություն: Այնուամենայնիվ, այսօրվա դրությամբ միայն E-volo-ն է մոտեցել կոնցեպտի փուլը հաղթահարելուն: Անցած տարվա մարտին ընկերությունն անցկացրել է Volocopter VC200-ի նախատիպի առաջին փորձնական թռիչքը:

E-volo-ի ներկայացուցիչների խոսքերով՝ Volocopter 2X-ի կանոնավոր օգտագործումը Գերմանիայում կսկսվի 2018 թվականին: Այն կարող է ցամաքից կառավարել օպերատորը, ինչպես նաև՝ ընթանալ ուղեգծով ինքնուրույն կամ կառավարվել օդաչուի կողմից: Բայց օրենսդրական սահմանափակումների պատճառով՝ սկզբնական շրջանում կօգտագործվի միայն երրորդ տարբերակը:

Բազմակոպտերը (մի քանի օդային պտուտակ ունեցող պտուտակաթև թռչող սարք) կարող է ընդունել մինչև 160 կիլոգրամ բեռ կամ միջին ծանրության երկու մարդու: Առավելագույն ծանրաբեռնվածությամբ՝ թռչող սարքը կարող է 70 կմ/ժ արագությամբ անցնել 27 կիլոմետր կամ 27 րոպե մնալ օդում, բայց այդ դեպքում արագությունը չպետք է գերազանցի 50 կմ/ժ:

Սարքի առավելագույն արագությունը կազմում է 100 կիլոմետր/ժամ, իսկ մարտկոցների լիցքավորումը տևում է մոտ երկու ժամ:

Volocopter 2X-ի գնի մասին պաշտոնապես դեռ չի հաղորդվում: