Տամագոչին «վերադարձել» է Ճապոնիա (լուսանկարներ)

Ճապոնիայում «վերակենդանացրել» են 20 տարի առաջ տարածում գտած և այնուհետև անհետացած տամագոչի խաղալիքը. տեղական Bandai արտադրողը վերարտադրել և շուկա է վերադարձրել այն: Այս մասին հայտնում է Mashable-ը:

Աղբյուրի տվյալների համաձայն` նորացված տամագոչիի արժեքը 13,55 ԱՄՆ դոլար է, այն հասանելի է բացառապես ճապոնական խանութներում:

Նշվում է, որ նորացված տամագոչին փաստացիորեն չի տարբերվում օրիգինալից. միակ տարբերությունն այն է, որ նորույթը երկու անգամ ավելի կոմպակտ է օրիգինալից: Օգտատերերի համար հասանելի է 6 տարբեր տամագոչի կերպար:

Տամագոչին էլեկտրոնային խաղալիք է, որն օգտատերերին թույլ է տալիս վիրտուալ ընտանի կենդանի ունենալ` խնամելով և մեծացնելով նրան: Առաջին անգամ դրանք շուկայում հայտնվել են 1996 թվականին Ճապոնիայում, իսկ 1997 թվականին` ԱՄՆ-ում և Եվրոպայում:

Հայտնի է, որ թողարկման առաջին տարիների ընթացքում ամբողջ աշխարհում վաճառվել է խաղալիքի մոտ 40 միլիոն նմուշ: