ՀՀԿ շտաբում քվեաթերթիկի ձևանմուշը օգտագործել են որպես քարոզչական նյութ. Տիգրան Մուկուչյանը «Ելքի» ահազանգի մասին

15:40 • 12.05.17

Նոր իրավակարգավորումների համաձայն՝ քվեաթերթիկը ընտրողի ձայն կրող փաստաթուղթ դառնում է այն դեպքում, երբ ունենում է իրեն փակցված համապատասխան ինքնասոսնձվող դրոշմանիշ։  

Այս մասին azatutyun.am-ի հետ զրույցում ասել է Կենտրոնական ընտրական հանձնաժողովի նախագահ Տիգրան Մուկուչյանը՝ անդրադառնալով «Ելք» դաշինքի ավագանու թեկնածու Նիկոլ Փաշինյանի հրապարակած տեսանյութին, ըստ որի՝ քաղաքապետ Տարոն Մարգարյանի՝ Մալաթիա-Սեբաստիա համայնքի նախընտրական շտաբերից մեկում 20-հազարանոցներ և քվեարկված քվեաթերթիկներ են բաժանում։

«Նյութերի հետ կապված հաղորդում են ներկայացրել, բնականաբար պետք է իրավապահ մարմիններն իրականացնեն գործողություններ։ Ինչ վերաբերում է քվեարկված քվեաթերթիկներին, ապա մենք փորձել ենք պարզաբանումներ ստանալ այդ կապակցությամբ։ Պարզաբանվել է, որ այդ քվեաթերթիկները բացարձակ կապ չունեն այն քվեաթերթիկների հետ, որոնք քվեարկության օրը տրամադրվելու են քաղաքացիներին»,-տեղեկացրել է ԿԸՀ-ի նախագահը։

Նա պարզաբանել է, որ դրանք եղել են քարոզչական բնույթ կրող նյութեր. քվեաթերթիկի ձևանմուշը վերցրել են՝ «նմուշ» ձևակերպմամբ և փորձել են օգտագործել որպես քարոզչական մեխանիզմ։ Դրանք որևէ եղանակով չեն կարող քվեարկության ժամանակ օգտագործվել։

«Դրանով ընտրողների հետ հանդիպման ժամանակ պետք է պարզաբանվի, թե ինչպես պետք է իրականացվի քվեարկությունը։ Փորձել ենք հասկանալ, թե ինչ քվեաթերթիկ է եղել, քանի որ շրջանառվում էր «քվեաթերթիկ» եզրույթը։ Ի՞նչ քվեաթերթիկներ են, որովհետև քվեաթերթիկները գտնվում են տարածքային հանձնաժողովներում, դրանք դեռևս տեղամասային հանձնաժողովներին էլ չեն հատկացվել և ընդհանրապես որևէ մեկին չեն տրամադրվել։ Նոր իրավակարգավորումների տեսանկյունից բացառվում է ինչ-որ ձևով այդ քվեաթերթիկներն օգտագործել։ Հետևաբար դատարկ, չքվեարկած քվեաթերթիկը, ինքնասոսնձվող դրոշմանիշ չպարունակող քվեաթերթիկը որևէ պարագայում չի կարող համարվել փաստաթուղթ»,- հայտարարել է Տիգրան Մուկուչյանը։

Իսկ 20 հազար դրամի մասով ԿԸՀ-ի նախագահը որևէ տեսակետ չհայտնեց, քանի որ իրականացվում է քննություն։



Զանի Հարոյան