Երևանի ավագանու ընտրությունների ընթացքում արձանագրված եզակի միջադեպերը չեն կարող ստվերել ընտրությունների ընթացքը. Արմեն Աշոտյան (տեսանյութ)

20:22 • 14.05.17

Երևանի ավագանու ընտրությունների ընթացքում արձանագրված եզակի միջադեպերը տհաճ են, սակայն իրենց եզակի բնույթով չեն կարող ստվերել ընտրությունների ընթացքը:

Այս մասին այսօր լրագրողների հետ հանդիպման ժամանակ ասաց Հայաստանի Հանրապետական կուսակցության փոխնախագահ Արմեն Աշոտյանը. «Արդյունքը կլինի լեգիտիմ, սպասենք արդյունքներին, որպեսզի փաստենք, որ այսօրվա միջադեպերը չեն կարող ստվերել ընտրությունների ընթացքը»:

Արմեն Աշոտյանը նաև հույս հայտնեց, որ ՀՀԿ-ի մրցակից ուժերը չեն դիմի քարոզչական և հակաքարոզչական միջոցների իրենց վարկանիշի համար։ Իսկ ինչ վերաբերում է ՀՀԿ-ին, ապա այն աշխատել է օրենքի շրջանակներում:

«Այն դեպքերը, որոնք իրավապահների կողմից կդիտվեն որպես օրենքի խախտում, պետք է իրենց ընթացքը ստանան: Ինչ վերաբերում է այն հայտարարություններին, թե ցածր մասնակցություն է գրանցվել, ապա ասեմ, որ սրանք տեղական ինքնակառավարման մարմնի ընտրություններ են»,-ասաց Աշոտյանը:

Նրա խոսքով՝ ցածր մասնակցությունը ընտրությունների ապաքաղաքական լինելու կարևոր ապացույցներից մեկն է, թեև ՀՀԿ-ի համար ցանկալի էր, որ մասնակցությունը լիներ ավելի բարձր:

«Փաստենք, որ արդյունքների ամփոփումը ցույց կտա, թե այդ մասնակցությունն ինչի հետևանք է: Իմ կարծիքով՝ այս ամենը հետևանքն է այն բանի, որ մեր մրցակիցները չեն կարողացել ներգրավել երևանցիներին: Գուցե մի քիչ առաջ եմ ընկնում, սակայն եթե սխալ լինեմ, ցանկացած ժամի կարող եք ասել»,-ասաց նա։