Պուտինը կոչ է արել երկրներին հրաժարվել ռազմաշունչ հռետորաբանությունից
Ռուսաստանի Դաշնության նախագահ Վլադիմիր Պուտինը հայտարարել է, որ հանուն համաշխարհային տնտեսության հետագա զարգացման՝ երկրները պետք է հրաժարվեն ռազմաշունչ հռետորաբանությունից:
Ինչպես նշում է gazeta.ru-ն, այս մասին Պուտինն ասել է Պեկինում ընթացող «Մեկ գոտի՝ մեկ ուղի» միջազգային համաժողովի ժամանակ:
Պուտինի կարծիքով՝ համաշխարհային տնտեսական զարգացման գործում լուրջ խոչընդոտ է երկրների ռազմաշունչ հռետորաբանությունը, որը միայն վատթարացնում է իրավիճակը: ՌԴ նախագահը կոչ է արել հրաժարվել դրանից՝ ընդգծելով թարմ գաղափարների կարևորությունը:
Ինչպես ավելի վաղ հայտնել էր Tert.am-ը, Հնդկաստանը վիճելի տարածքների պատճառով որոշել է բոյկոտել Պեկինում ընթացող «Մեկ գոտի՝ մեկ ուղի» միջազգային համաժողովը:
Պեկինի առաջարկած նախագծում խոսվում է պակիստանա-չինական տնտեսական միջանցքի մասին, որը պետք է անցնի Հնդկաստանի և Պակիստանի համար վիճահարույց Գիլգիտ Բալտիստան տարածքով:
«Ոչ մի երկիր չի համաձայնի մի նախագծի հետ, որն անտեսում է իր ինքնիշխանությանն ու տարածքային ամբողջականությանն առնչվող կարևորագույն խնդիրները»,-նշվում է ԱԳՆ-ի հայտարարությունում:
Պեկինում մայիսի 14-15-ն ընթանում է «Մեկ գոտի՝ մեկ ուղի» միջազգային համագործակցության համաժողովը, որին մասնակցում է 29 երկրի ղեկավար՝ այդ թվում նաև Ռուսաստանի Դաշնության նախագահ Վլադիմիր Պուտինը:
2013 թվականին Չինաստանը հայտարարել էր տնտեսական զարգացման նոր ռազմավարության մասին, որը ներառում է 2 հիմնական ուղղություն՝ «Մետաքսի ճանապարհի» տնտեսական գոտին և ծովային «Մետաքսի ճանապարհը»։ Խոսքն Արևելքից Արևմուտք արտոնյալ պայմաններով ապրանքների մատակարարումների համար առևտրային միջանցքի ստեղծման մասին է։










