Ամերիկացի կոնգրեսականը ողջունել է Լոս Անջելես-Երևան ուղիղ չվերթներ սկսելու շուրջ բանակցությունները
ԱՄՆ Կոնգրեսի Ներկայացուցիչների պալատի Տրանսպորտի, ենթակառուցվածքների և ավիացիայի հարցերով ենթահանձնաժողովի բարձրաստիճան անդամ Գրեյս Նապոլիտանոն ողջունել է Ամերիկայի Հայ դատի հանձնախմբի (ANCA) և Լոս Անջելեսի միջազգային օդանավակայանի (ԼԱՄՕ) պաշտոնական ներկայացուցիչների բանակցությունները Երևանի և Լոս Անջելեսի միջև ուղիղ չվերթներ սկսելու հարցի շուրջ:
«Անչափ ոգևորված եմ, որ ANCA-ն և Լոս Անջելեսի միջազգային օդանավակայանը Լոս Անջելեսի և Երևանի միջև ուղիղ չվերթներ սկսելու վերաբերյալ երկխոսություն են սկսել: Որպես ենթահանձնաժողովի անդամ՝ ես իմ աջակցությունն եմ հայտնում այս նախաձեռնությանը: Ջերմագին ողջունում եմ ANCA-ին և ԼԱՄՕ-ին այս հարցում առաջին քայլերն անելու համար»,-մեջբերում է Asbarez-ը դեմոկրատ կոնգրեսականի խոսքը:
Ինչպես ավելի վաղ հայտնել էր Tert.am-ը, ANCA-ի ներկայացուցիչները հանդիպել են Լոս Անջելեսի միջազգային օդանավակայանի պաշտոնական ներկայացուցիչների հետ և քննարկել ԱՄՆ-ի և Հայաստանի միջև ուղիղ չվերթներ սկսելու հարցը:
ANCA-ի ներկայացուցիչների համաձայն՝ այս հարցում առաջնահերթ է ոչ միայն ճանապարհորդների ժամանակը խնայելը, հարմարավետությունը, այլ նաև զբոսաշրջության զգալի խթանումը, բիզնես ճանապարհորդությունների թվի մեծացումը, ապրանքափոխադրումների ընդլայնումը և ԱՄՆ-Հայաստան երկկողմ տնտեսական հարաբերությունների հզորացումը:
Նշվում է, որ ANCA-ն ներկայացրել են նախագահ Ռաֆֆի Համբարյանը և ANCA-ի ներկայացուցիչ Զանգու Արմենյանը:
Նշենք, որ March To Justice-ը խնդրագիր է հրապարակել, որը կարող են ստորագրել այս գաղափարի աջակիցները՝ դիմելով ԱՄՆ տրանսպորտի նախարար Էլեյն Չաոյին:










