Էդվարդ Սնոուդենը դավաճան չէ. Պուտին
Ռուսաստանի Դաշնության նախագահ Վլադիմիր Պուտինն ամերիկացի ռեժիսոր Օլիվեր Սթոունին տված հարցազրույցում ասել է, որ ԱՄՆ հետախուզական ծառայությունների նախկին աշխատակից Էդվարդ Սնոուդենին դավաճան չի համարում:
Ինչպես նշում է Hollywood Reporter-ը, ՌԴ ղեկավարի կարծիքով՝ նախկին գաղտնի գործակալը, որն արդեն մի քանի տարի է՝ ապաստանել է Ռուսաստանում, չի դավաճանել իր երկրի ազգային շահերին:
«Նման բան բացառապես չկա: Սնոուդենը դավաճան չէ: Նա չի դավաճանել իր երկրի շահերին ու այլ պետությանը չի փոխանցել որևէ տեղեկություն, որը կարող էր վնաս հասցնել հարազատ ժողովրդին: Այն ամենը, ինչ նա անում է, անում է հրապարակավ»,-ասել է Պուտինը:
Սթոունի այն հարցին, թե արդյոք ինքը հավանություն է տալիս Սնոուդենի գործողություններին, ՌԴ նախագահը բացասական պատասխան է տվել: Պուտինն ընդգծել է, որ թեև ԱՄՆ Ազգային անվտանգության գործակալությունը (ԱԱԳ) շատ հեռուն է գնացել ուրիշներին լրտեսելու հարցում, այնուհանդերձ՝ Սնոուդենը չպետք է հրապարակեր սկանդալային տեղեկություններն ԱԱԳ-ի մասին:
«Եթե նրան ինչ-որ բան դուր չէր գալիս իր գործում, ապա նա պետք է ուղղակի աշխատանքից դուրս գար և վերջ: Բայց նա հեռուն գնաց, ինչն իր իրավունքն է: Բայց, եթե Դուք իմ կարծիքն եք հարցնում, ապա ասեմ, որ ես դա սխալ եմ համարում»,- Սնոուդենի արարքը մեկնաբանելիս ասել է Պուտինը:
Նա նաև հավելել է, որ ռուսական հատուկ ծառայություններն աշխատում են միայն օրենքի շրջանակում:










