Արտակարգ դեպք Ախուրյանի շաքարի գործարանում. մեկ մարդ մահացել է, մեկը՝ հոսպիտալացվել
Շիրակի մարզի Ախուրյան համայնքում գտնվող շաքարի գործարանում այսօր միջադեպ է գրանցվել, որի արդյունքում մահացել է 40 ամյա տղամարդ ու վիրավորվել է 1986թ.-ին ծնված երիտասարդ:
Դեռևս պարզ չէ, թե ինչ հանգամանքներում են վայր ընկել տղամարդիկ:
Tert.am-ի հետ զրույցում թե՛ Ախուրյանի, թե՛ հարևան Արևիկ համայնքների ղեկավարները ասացին, որ տեղյակ են, որ նման դեպք է եղել, բայց տեղեկություն չունեն, թե ով է նա, որովհետև իրենց գյուղերի բնակիչը չէ:
Վնասվածնքներ ստացած երիտասարդը ներկայումս գտնվում է Գյումրիի բժշկական կենտրոնում:
Ինչպես Tert.am-ի հետ զրույցում ասաց Գյումրիի բժշկական կենտրոնի բժիշկ Ալեքսանյանը, երիտասարդի առողջական վիճակը գնահատվել է բավարար և նա գտնվում է բժիշկների հսկողության տակ:
«Փափուկ հյուսվածքների սալջարդեր է ստացել ու քերծվածքներ»,- ասաց Ալեքսանյանը:
Բժիշկը նշեց, որ մանրամասն ծանոթ չէ, թե ինչ պայմաններում է երիտասարդը ստացել վնասվածքները, բայց ասաց, որ հարազատների խոսքով նա բարձրությունից է ընկել:
Ախուրյանի համայնքապետն էլ Tert.am-ի հետ զրույցում ասաց, որ իրեն հեռախոսով են տեղեկացրել, որ միջադեպ է տեղի ունեցել, բայց թե ինչ է եղել՝ տեղյակ չէ: Նա էլ հաստատեց, որ երիտասարդը իրենց գյուղի բնակիչ է, վայր է ընկել բարձրությունից ու ստացել սալջարդ:










