Մոտ երեք շաբաթ հետո կսկսվի Պոլսո պատրիարքարանի ընտրությունների անցկացման գործընթացը․ Սահակ Մաշալյան

20:30 • 03.06.17

Մոտ երեք շաբաթ հետո կսկսվի Պոլսո պատրիարքարանի ընտրությունների անցկացման գործընթացը, իսկ մինչ այդ Պոլսո պատրիարքի տեղապահ ընտրված Գարեգին Բեքչյանը և Պոլսո պատրիարքի փոխանորդ Արամ Աթեշյանը կլինեն Էջմիածնում: Այս մասին Tert.am-ին հաղորդեց Պոլսո հայոց պատրիարքարանի կրոնական ժողովի ատենապետ տեր Սահակ եպիսկոպոս Մաշալյանը:

«Նախևառաջ տեղապահ սրբազանն իր գործերը պետք է կատարի՝ Հայաստան պետք է գա այս շաբաթ, հետո Գերմանիա պետք է վերադառնա:  Հավանաբար, տասն օր հետո նա կվերադառնա Ստամբուլ և կսկսենք պատրիարքարանի գույքի և ֆինանսական միջոցների փոխանցումը, այսինքն՝ տեղապահի  պաշտոնականացումը: Հետո պետք է նախաձեռող մարմին կազմվի, և այսպես ամառվա ընթացքում կսկսվի պատրիարքի ընտրությունների անցկացման գործընթացը»,- ասաց նա:

Հիշեցնենք, որ փետրվարին Էջմիածնում կայացված որոշման համաձայն՝ մարտի 15-ին Ստամբուլում տեղի ունեցավ Պոլսո Հայոց պատրիարքի տեղապահի ընտրություն: Ընտրությունից հետո, որում համոզիչ հաղթանակ էր տարել Արամ Աթեշյանի հակառակորդ Գարեգին արքեպիսկոպոս Բեքչյանը, Ստամբուլի նահանգապետարանն անակնկալ կերպով միջամտել էր ընտրություններին: Ստամբուլի նահանգապետի տեղակալը, նախքան պատրիարքարանում ընտրությունների սկսվելը, գրություն էր ուղարկել, որն իրավաբանորեն անհնար էր համարում պատրիարքական ընտրությունների գործընթացի մեկնարկը: Այս գրությունը Պոլսո Հայոց պատրիարքի տեղապահի ընտրություններից անմիջապես հետո պատրիարքարանի հոգևորականներին էր ներկայացրել տեղապահի ընտրություններում պարտված փոխանորդ Արամ արքեպիսկոպոս Աթեշյանը և հայտարարել, որ չի հեռանա տեղապահի պաշտոնից:

Սակայն մայիսի 24-ին հայտնի դարձավ, որ Արամ Աթեշյանը Ստամբուլի հայ համայնքի հիմնադրամների ղեկավարների ու բարերարների հետ կայացած հանդիպման ընթացքում հայտարարել է իր հրաժարականի մասին:

Սահակ Մաշալյանը պատմեց, որ երեկ երեք ժամանոց խորհրդակցություն է եղել Գարեգին Բեքչյանի և Արամ Աթեշյանի միջև, խոսակցության մասնրամասները նրանք չենք ցանկանում հաղորդել, բայց, ըստ Սահակ սրբազանի, հստակ է, որ Արամ սրբազանը պատրիարքի փոխանորդի իր պաշտոնը թողնելու է, և տեղապահ ընտրված Գարեգին Բեքչյանն ընդունելու է այն:

Գարեգին Բեքչյանի և Արամ Աթեշյանի այցը Մայր Աթոռ Սուրբ Էջմիածին՝ նախքան պատրիարքի ընտրությունների գործընթացին մեկնարկ տալը, Սահակ Մաշալյանը պատճառաբանեց՝ ընթացակարգն է պահանջում: «Մայր աթոռը կարևորում է, որ իր բոլոր եպիսկոպոսներն իր կողքին լինեն»,- ասաց նա:

Դեռ ընտրությունների անցկացման օրվա մասին հստակ նշել, ըստ Սահակ Մաշալյանի, անհնար է: Նրա խոսքով՝  նախ պետք է կազմվի ընտրություններն անցկացնող հանձնախումբը, որը բաղկացած է լինելու 15-21 հոգանոց խմբից. այնտեղ ներառվելու են մարդիկ և՛ հոգևոր, և՛ աշխարհիկ դասից: Վերջիններս  թաղային ատենապետեր և բարերարներ են:

«Հիմա համայնքում կրքերը հանդարտվել են, քանի որ պետությունն ընդունել է պատրիարքի ընտրությունների անցկացումը, և տեղապահ ընտրված Գարեգին Բեքչյանը պաշտոնապես պետք է ընտրություններն անցկացնի: Պայքարն ու կրքերը դրանց համար էին»,- ասաց նա: