Մոլդովայի խորհրդարանի խոսնակը Դոդոնի փոխարեն ժամանակավորապես կստանձնի նախագահի լիազորությունները

12:54 • 24.10.17

Մոլդովայի խորհրդարանի խոսնակ Անդրիան Կանդուն երկրի նախագահ Իգոր Դոդոնի փոխարեն ժամանակավորապես կկատարի պետության ղեկավարի պարտականությունները և կստորագրի պաշտպանության նախարարի նշանակման մասին հրամանագիրը: Այդ մասին հայտնում է Մոլդովայի խորհրդարանի ղեկավարի մամուլի ծառայությունը, հաղորդում է lenta.ru-ն:


Կանդուն մտադիր է հոկտեմբերի 24-ին ստորագրել Էուջեն Ստուրզային պաշտպանական գերատեսչության ղեկավարի պաշտոնում նշանակելու մասին հրամանագիրը, եթե նախագահի աշխատակազմից խորհրդարանը ստանա բոլոր անհրաժեշտ փաստաթղթերը:


Մոլդովայի ռուսամետ նախագահ Իգոր Դոդոնի և եվրոպամետ կառավարության միջև հերթական վեճը ծագել է պաշտպանության նախարարի նշանակման պատճառով: Դոդոնը երկու անգամ մերժել է վարչապետ Պավել Ֆիլիպի առաջադրած Էուջեն Ստուրզայի թեկնածությունը:


Հոկտեմբերի 20-ին երկրի սահմանադրական դատարանը քննել է կառավարության դիմումն առ այն, թե արդյոք արդարացված է պետության ղեկավարի ժամանակավոր փոխարինումը մեկ այլ պաշտոնատար անձով այն դեպքում, եթե նախագահը հրաժարվում է կատարել իր պարտականությունները:


Դատարանը հայտարարել է, որ Դոդոնը «ժամանակավորապես ի վիճակի չէ կատարել իր պարտականությունները», և թույլ է տվել նրա լիազորությունները փոխանցել խորհրդարանի նախագահին կամ վարչապետին:


Անդիան Կանդուն հայտարարել է, որ դատարանի որոշումը չի անդրադառնա նախագահի մյուս լիազորություններին, նրա մանդատին կամ գործողություններին, և դա միայն իրավիճակը, երբ երկրում գրեթե մեկ տարի չկա պաշտպանության նախարար, հանգուցալուծելու միջոց է: