ԱՆ-ը հերքում է, թե Արծվաբերդում արձանագրված տուլարեմիայի դեպքերն ադրբեջանական թռչող սարքի միջոցով վարակի տարածման հետևանք են

17:54 • 24.10.17

Տավուշի մարզի Արծվաբերդ համայնքի բնակչության շրջանում արձանագրված տուլարեմիայի դեպքերն ադրբեջանական թռչող սարքի միջոցով վարակի տարածման հետևանք չեն: 

Այս մասին Tert.am-ին տեղեկացրեցին Առողջապահության նախարարության մամուլի ծառայությունից: Մեզ պարզաբանեցին, որ տուլարեմիան բնական օջախային հիվանդություն է, և մեր երկրի տարածքի 95%-ը համարվում է դրա նկատմամբ բնական օջախ:

«Հիվանդության վարակի աղբյուրը համարվում են հիմնականում կրծողները, իսկ վարակի փոխանցողները` տզերը: Հիվանդության դեպքերն արձանագրվել են միայն Արծվաբերդ համայնքում և այն էլ՝ համայնքի մեկ հատվածում։ Իրականացված կենդանամակաբուծաբանական և համայնքից վերցված ցորենի, գարու, ծղոտի նմուշների լաբորատոր հետազոտությունների արդյունքները եղել են բացասական։ Վերլուծությունները վկայում են, որ վարակի հավանական պատճառը գյուղատնտեսական աշխատանքների ընթացքում հիվանդ կրծողի՝ համայնք ներթափանցումն է»,- ասված է պատասխանում:

Առողջապահության նախարարությունից վստահեցրին՝ հիվանդության կանխարգելման մասով աշխատանքներ տարվել են: Նրանց խոսքով՝ հիվանդության հետագա կանխարգելման և ռիսկերի նվազեցման նպատակով Արծվաբերդ, Չինար, Այգեձոր, Նորաշեն, Չորաթան, Վերին Կարմիր աղբյուր համայնքների բնակչության շրջանում իրականացվել են կանխարգելիչ պատվաստումներ»:

Tert.am-ը խնդրի շուրջ պարզաբանում խնդրեց նաև Պաշտպանության նախարարությունից: ՊՆ մամուլի խոսնակ Արծրուն Հովհաննիսյանն էլ տեղեկացրեց, որ ՊՆ-ն տուլարեմիա հիվանդության տարածման մանրամասների մասին տեղեկատվություն չունի: Միևնույն ժամանակ Հովհաննիսյան ասաց. «ՀՀ անկախացումից ի վեր Ադրբեջանը նման փորձ չի արել, այսինքն՝ անօդաչու թռչող սարքերի միջոցով հակառակորդն այս կամ այն հիվանդությունը չի տարածել»:

Նշենք, որ «Ժողովուրդ» օրաթերթ գրել էր, որ իրենց հետ զրույցում «Արծվաբերդի առողջության կենտրոն»-ի տնօրենը վստահեցրել է, թե տուլարեմիա հիվանդությունը ադրբեջանական թռչող սարքի միջոցով է տարածվել:
 

 

ՀեղինակԱնի Օհանյան