Բանավեճ ԱԺ-ում. Խոսրով Հարությունյանը Նաիրա Զոհրաբյանի դիտողությունը որակեց որպես թաղային հեղինակություններին բնորոշ բառամթերք (ուղիղ)
Այսօր ԱԺ–ում «Ծառուկյան դաշինք» խմբակցության պատգամավորների կողմից ներկայացված «Տնտեսական մրցակցության պաշտպանության մասին» ՀՀ օրենքի նախագծի քննարկմանը ամբիոնին մոտեցավ ՀՀ ազգային ժողովի տնտեսական հարցերի մշտական հանձնաժողովի նախագահ Խոսրով Հարությունյանը և մինչ բուն նախագծին կանդրադառնար, պատասխանեց «Ծառուկյան դաշինքի» խմբակցության պատգամավոր Նաիրա Զոհրաբյանի՝ իրեն ուղղված արտահայտությանը:
«Անցյալ օրը քննարկումներից մեկի ժամանակ իմ հասցեին հնչեց արտահայտություն. տիկի՛ն Զոհրաբյան, թույլ տվեք նկատել այսպես` թաղային հեղինակություններին բնորոշ տոնով և բառամթերքով: Անկասկած, մեկ այլ պարագայում ինձ հասցեագրված այդ արտահայտությունն անպատասխան չէի թողի, բայց հավատացնում եմ ձեզ` իմ դաստիարակությունը թույլ չի տալիս հաշվի չառնել, որ դուք կին եք, ուստի մտերմաբար, բարեկամաբար, դուք ոչ միայն կուսակցության ներկայացուցիչ եք, նաև կին, հետևաբար փորձեք կնոջը բնորոշ նազանքով, վեհությամբ այս ամբիոնն օգտագործել: Ընդունեք սա որպես ավագ ընկերոջ բարեկամական հորդոր»,-ասաց նա:
Նշենք, որ օրեր առաջ, նաև այսօր Նաիրա Զոհրաբյանը նշել էր` «մեզ հետ սպառնալիքով չխոսեք»` նկատի ունենալով Խոսրով Հարությունյանի` հանձնաժողովի առջև դրված պայմանը` կա՛մ օրենքը հիմա է ընդունվում այս տեսքով, կա՛մ երբեք:
Խոսրով Հարությունյանն այնուհետև անդրադարձավ ներկայացված նախագծին. ասաց, որ քաղաքական նպատակը լուրջ է և շատ կարևոր, որը փորձ է նախևառաջ ՓՄՁ շուկայում տրամաբանական իրավիճակ ստեղծելու:
Խոսրով Հարությունյանի խոսքով՝ այս նախագիծը վառ օրինակ է, որ Կառավարությունը չի մերժում ընդդիմության առաջարկները և եթե կա տրամաբանություն՝ հաճույքով աջակցում է:
Քննարկմանն արձագանքեց ԱԺ փոխնախագահ Միքայել Մելքումյանը, ում հարցադրումը նախագծին չէր վերաբերում: «Մեր գործընկերոջ մասին ասացիք` պատեհ չեք համարում և այլն: Ինչի՞ եք սպասել, կարելի էր շատ հանգիստ մոտենալ, զրուցել և պրոբլեմները հանել, ինչո՞ւ էիք ուզում հնչեցնել, ո՞րն է նպատակը... Որովհետև, երբ ասացիք հիմա կամ երբեք, դուք շատ լավ գիտեիք. անցյալ քննարկման ժամանակ չէի ուզում ասել, բայց հիմա կասեմ… ասում էի՝ իջեցնեք 80 մլն-ի շեմը, ինչի՞ դա քվեարկության չդրեցիք»,-պարզաբանում պահանջեց Մելքումյանը:
Խոսրով Հարությունյանը նշեց, թե չեն համաձայնել առաջարկին, քանի որ խմբակցությանն առաջարկվել է վիճակագրությանը հետևել և նոր միայն այդ ճանապարհով գնալ. «Բայց դուք մերժեցիք, ասացիք` ոչ, հիմա դրեք: Ես համոզվում եմ, որ դուք այդքան մտահոգված չեք, որ ՓՄՁ-ների վիճակը բարելավվի, այլ հաճույք զգացիք, որ մենք մերժեցինք այդ նախաձեռնությունը՝ համոզված լինելով, որ այս ամբիոնը կօգտագործեք ոչ օբյեկտիվ ներկայացնելու համար»,-պատասխանեց Հարությունյանը, ապա անցավ կրկին Նաիրա Զոհրաբյանին. «Ինչ վերաբերում է Ձեր կուսակցության անդամին` ես շատ կոռեկտ ասացի, որ եթե իրոք որևէ մեկը բան ուներ ասելու, կարող էր մոտենալ և ասեր ինձ առանձին, ի՞նչն էր խնդիրը»,-ասաց նա:
Միքայել Մելքումյանը նշեց, թե ինքը կոռեկտության կողմնակից է:
Ելույթ ունեցավ նաև «Ծառուկյան» խմբակցության պատգամավոր Սերգեյ Բագրատյանը, ով նշեց, որ եթե քննարկելու նյութ կար, Հարությունյանը կարող էր քննարկել առանձին: «Անթույլատրելի եմ համարում որևէ կնոջ վարք քննարկել, մենք կարող ենք պարզաբանել խնդիրը, սա կրտսեր ընկերոջ կարծիք է՝ ուղղված պարոն Հարությունյանին»,-ասաց նա:
Խոսրով Հարությունյանը նշեց, թե իր համար կոմֆորտ չէ նրանց առաջարկը մերժելը և իր նպատակը եղել է « անկեղծ, մաքուր», փորձել է ստեղծել կոմպրոմիսի հնարավորություն:










