Գրենլանդական ծովում ռուսական ուղղաթիռ է կործանվել

20:17 • 26.10.17

Հյուսիսային Սառուցյալ օվկիանոսի Շպիցբերգեն կղզեխմբի Բարենցբուրգ բնակավայրի մոտակայքում ռուսական ուղղաթիռ է վթարվել: РИА Новости-ի փոխանցմամբ՝ այս մասին տեղեկացրել է Հյուսիսային Նորվեգիայի փրկարար ծառայությունը:

«Ութ մարդ տեղափոխող ռուսական ուղղաթիռը Բարենցբուրգից 2-3 կմ հեռավորությամբ ընկել է ծովը: Հյուսիսային Նորվեգիայի փրկարար ծառայությունը համակարգում է փրկարարական աշխատանքները, մանրամասներ չեն հաղորդվում», - ասվում է ծառայության թվիթերյան հաղորդագրության մեջ:

Փրկարարների տվյալներով՝ ուղղաթիռը տագնապի ազդանշան չի տվել: Այն հայտնաբերել դեռևս չի հաջողվել:

ՌԴ ԱԻՆ-ից հաստատել են, որ Մի-8 ուղղաթիռն անհետացել է ռադարների տեսադաշտից Գրենլանդական ծովի տարածքում, ուր ուղևորվել էր ռուսական Պիրամիդա շրջանից: