Կիմ Չեն Ընը շնորհավորել է Սի Ծինփինին Չինաստանի Կոմկուսի կենտկոմի գլխավոր քարտուղար վերընտրվելու առթիվ
Հյուսիսային Կորեայի ղեկավար Կիմ Չեն Ընը շնորհավորել է Սի Ծինփինին Չինաստանի Կոմունիստական կուսակցության կենտրոնական կոմիտեի գլխավոր քարտուղարի պաշտոնում վերընտրվելու կապակցությամբ:
Ինչպես տեղեկացնում է Reuters-ը, հյուսիսկորեացի առաջնորդի հեռագրում նշվում է, որ «այսօր չինացի ժողովուրդը Սի Ծինփինի գլխավորած Կոմկուսի կենտկոմի ղեկավարության ներքո բռնել է նոր դարաշրջանի սոցիալիզմի կառուցման ուղին»:
Բացի այդ, Կիմ Չեն Ընն աշխատանքային մեծ հաջողություններ է մաղթել չինացի գործընկերոջը՝ վստահություն հայտնելով առ այն, որ երկու պետությունների և երկու կուսակցությունների միջև հարաբերությունները կզարգանան ի շահ չինացի և հյուսիսկորեացի ժողովուրդների։
Հավելենք, որ Հյուսիսային Կորեայի շուրջ ստեղծված ճգնաժամային իրավիճակում Չինաստանն ԱՄՆ-ի կողմից դիտարկվում է որպես հավանական միջնորդ պետություն: Միացյալ Նահանգների նախագահ Դոնալդ Թրամփը բազմիցս դիմել է Ծինփինին՝ պահանջելով բանեցնել Փհենյանի նկատմամբ ունեցած ազդեցության լծակներն ու ստիպել այդ երկրին վերջ տալ միջուկային և հրթիռային փորձարկումներին:










