Կրեմլում մեկնաբանել են Պուտինին դատի տալու մասին Նավալնիի որոշումը

17:20 • 02.11.17

Ռուսաստանի իշխանություններն արձագանքել են հանրահավաքների անցկացման արգելքի պատճառով ՌԴ նախագահ Վլադիմիր Պուտինի դեմ հայց ներկայացնելու մտադրության մասին ռուս ընդդիմադիր գործիչ Ալեքսեյ Նավալնիի խոսքերին, հայտնում է tvrain.ru-ն: Կրեմլում հայտարարել են, որ կապ չունեն ակցիաների թույլտվության տրամադրման հետ և չեն տվել ոչ մի հրահանգ քաղաքային իշխանությանը:


«Մենք չենք տրամադրում հանրահավաքների անցկացման թույլտվություններ: Մեր լիազորությունը չէ»,- ասել է լրատվամիջոցին ՌԴ նախագահի մամուլի քարտուղար Դմիտրի Պեսկովը՝ մեկնաբանելով Ալեքսեյ Նավալնիի մտադրությունը:


Ավելի վաղ հաղորդվել է, որ ռուս ընդդիմադիր գործիչ Ալեքսեյ Նավալնին հայտարարել է, որ դատի կտա ՌԴ նախագահ Վլադիմիր Պուտինին և նախագահի վարչակազմին: 


Նման որոշման համար պատճառ են հանդիսացել երկրի տարբեր քաղաքներում հանրահավաքներ համակարգելու հարցում տեղական իշխանությունների կողմից ստացված մերժումը:


Նավալնիի խոսքով՝ տեղական իշխանությունները «գործում են կազմակերպված, համաժամանակյա և Մոսկվայից եկող հրամանի համաձայն»: