1.5 տարվա ազատազրկումն ինձ չի կոտրել. Տիգրան Ուրիխանյանն ընդամենը գործիք էր, իսկ Վանոյի Արտակին ընդամենը ճանաչում եմ, ինչպես շատերին. Անի Հովհաննիսյան (տեսանյութ)
1,5 տարվա ազատազրկման, քրեակատարողական հիմնարկում առկա պայմանների, ԱԺ պատգամավոր Տիգրան Ուրիխանյանի և Վանոյի Արտակ անունով հայտնի Արտակ Գալստյանի հետ կապի, հետագա գործունեության, բացահայտումների և այլ հարցերի շուրջ Tert.am-ն զրուցել է «Անալիտիկ» կայքի տնօրեն Անի Հովհաննիսյանի հետ:
- Տիկի'ն Հովհաննիսյան, Ձեր ձերբակալության լուրը հանրային հնչեղություն ստացավ հենց սկզբից` պայմանավորված լինելով աշխատանքային գործունեությամբ: Ձեզ մեղադրանք առաջադրվեց երկու դրվագով՝ ՎՏԲ բանկից շորթում կատարելու դիտավորության, և ԱԺ պատգամավոր Տիգրան Ուրիխանյանից շորթում: Առաջին դրվագով, որն առավել խնդրահարույց էր,արդարացվեցիք, երկրորդով՝ ոչ: Չնայած պատիժը կրել եք, այնուամենայնիվ, վերաքննիչ բողոք կա և պահանջում եք արդարացնել Ձեզ: Իրավական հարթությունում որո՞նք են լինելու Ձեր քայլերը և արդյո՞ք տեղի ունեցածը զուտ իրավական հարթությունում էր:
-Նախաքննության ողջ ընթացքում ինձ առաջադրվել են տարբեր մեղադրանքներ, որոնք կարճվել են: Այդ մեղադրանքների առաջադրումը պայմանավորված է եղել իմ կալանքի ժամկետը երկարացնելու միտումով: Ես ի սկզբանե հայտարարել եմ, որ սա եղել է քաղաքական հաշվեհարդար, այս գործը չի եղել իրավական հարթության մեջ: Կար խնդիր ինձ բանտ տանելու, որպեսզի ես լռեմ, այսինքն` զուտ պատժելու համար, լռեցնելու այն, ինչ ես բարձրաձայնում էի: Սա ես համարում եմ լրատվամիջոցի նկատմամբ տոտալ ճնշման վիճակ, երբ կիրառվում են ստալինյան ժամանակաշրջանի ճնշման մեթոդներ: Ամբողջ՝ 1,5 տարվա ընթացքում, մասնավորապես նախաքննական փուլում, ճնշման բազմաթիվ դեպքեր են եղել, ուղղակի կար խնդիր իմ նկատմամբ տեսնել քաղաքական հաշվեհարդար:
-Հաջողվե՞ց լռեցնել Ձեզ:
-Ոչ, ինձ չհաջողվեց լռեցնել, ինձ հիմա էլ չի հաջողվի լռեցնել, քանի որ ես պայքարել և պայքարում եմ հանուն ոչ միայն իմ ազատության և իրավունքների, այլ հանուն նրա, որ Հայաստանում չլինի ճնշելու մեխանիզմ օգտագործելու երևույթը: Ես չեմ կոտրվել չեմ կոտրվելու, ես շարունակելու եմ իմ պայքարը, որքան էլ դժվար լինի: Եթե անգամ այդ մարդիկ որոշեն, որ ինձ նորից պետք է բանտ տանեն, թող տանեն, ես խնդիր չունեմ, եթե դա է նրանց աշխատելաոճը: Այստեղ ես երևույթի դեմ եմ պայքարում, որպեսզի հետագայում մենք չունենանք իմ կարգավիճակում հայտնված լրագրողներ կամ գործիչներ, ովքեր բարձրաձայնում են որոշ կառույցներին կամ մարդկանց ոչ հաճելի հարցեր:
-Ձեր ձերբակալման պահից սկսած միջադեպը կապվեց այլ մարդկանց հետ։ Հրապարակուներ եղան այն մասին, որ Վանոյի Արտակ անունով հայտնի Արտակ Գալստյանը, ըստ ՀՔԾ նյութերի, իր տնօրինության տակ գտնվող կայքերի, այդ թվում և «Անալիտիկի» միջոցով շորթում է կատարել: Ձեր պարզաբանումը:
-Նախ` ես ասեմ, որ Վանոյի Արտակ և այլ մարդկանց փորձել կապել ինձ կամ իմ գործունեության հետ, դա արվել է այն մարդկանց կողմից, ովքեր ի սկզբանե ուղղորդել են իմ դեմ սկսված այս արշավը: Ես երբևէ ո՛չ Վանոյի Արտակի, ո՛չ որևէ մեկի կողմից չեմ ուղղորդվել: Ես անձամբ հիմնադրել և ղեկավարել եմ «Analitik.am»-ը, Վանոյի Արտակի հետ ես ունեմ այնքան կապ, որքան կապ ես ունեմ Հայաստանում բոլոր այն մարդկանց հետ, ում ես ուղղակի ճանաչում եմ: Թե ինչու է նախաքննական մարմինը կապել Վանոյի Արտակի հետ, ի՞նչն է եղել նպատակը, ի՞նչ իրական ցանկություններ են նրանք հետապնդել, դա նախաքննական մարմինը պետք է պատասխանի և այդպես էլ չպատասխանեց: Նախաքննական մարմինը պետք է պարզեր, թե ովքեր են տարածում այդ նյութերը և ինչ նպատակով: Ինչո՞ւ չպարզեց։
-Դուք գիտե՞ք:
-Կգա ժամանակ ես, գուցե, կխոսեմ այդ մասին:
-Քրեակատարողական հիմնարկից դուրս գալուց հետո գրառում կատարեցիք այն մասին, որ կխոսեք և բացահայտումներ կանեք ժամանակի ընթացքում, հիմա էլ եք շեշտում՝ ժամանակի ընթացքում: Ինչի՞ն եք սպասում:
-Ես ուղղակի ասուլիս եմ հրավիրելու, որպեսզի հնարավորություն ունենամ ավելի լայն զանգվածի ներկայացնել և ասել այն, ինչ տեղի է ունեցել, ես հիմա էլ եմ ներկայացնում: Ես կխոսեմ որոշակի երևույթներից, որոնք ցանկալի չէ, որ այսօր լինեն Հայաստանում:
– Մտավախություն չկա՞, որ հետագայում Դուք նորից պատասխանատվության կենթարկվեք:
-Մտավախություն միշտ էլ կա, այսինքն`ի՞նչ է ստացվում, որ մենք պետք է տեսնենք, որ կան երևույթներ և բոլորս համակերպվե՞նք այն փաստի հետ։ Համակերպվե՞նք, որ կարող են յուրաքանչյուր օր յուրաքանչյուր լրատվամիջոցի, որն անդրադառնում է ոչ ցանկալի թեմաների, բանտ տանել, ճնշել։ Համակերպվե՞նք` մտածելով, որ գուցե նորից լինեն ճնշումներ: Ես չեմ պատրաստվում լռել, ես 1,5 տարի անցկացրել եմ բանտում, ով է ինձ պատասխան տալու: Ես 1,5 տարի անցկացրել եմ այն պայմաններում, որում չէի ուզենա, որ իմ թշնամին ապրի: Ես ինչո՞ւ պետք է վախենամ, երբ ես ճիշտ եմ և այդ ճիշտն ասել եմ ու ասելու եմ:
-Տիգրան Ուրիխանյանը դատաքննության ընթացքում հայտարարեց, որ ներել է Ձեզ: Ունեի՞ք այդ ներողության կարիքը, և ըստ Ձեզ, դա ազդեցություն թողե՞ց դատաքննության հետագա ընթացքի ու դատավճռի վրա:
-Նախ` Տիգրան Ուրիխանյանն այս ամբողջ պատմության մեջ եղել է օգտագործվող գործիքի դերում, ինչի մասին հայտարարել է իր իսկ ներկայացուցիչը դատաքննության ընթացքում: Տիգրան Ուրիխանյանի ներողությունն ինձ երբևէ պետք չի եղել, ես ուղղակի խղճում եմ նման մարդկանց, դա իր ընտրությունն է, ինքն է որոշել, որ պետք է օգտագործվի ինչ-որ մարդկանց նպատակների իրագործման համար: Մնացածը ես թողնում եմ մարդկանց տեսակետին, յուրաքանչյուրը թող բնորոշի իր այդ քայլն ըստ իր մտածելակերպի: Տիգրան Ուրիխանյանի արարքներն ինձ չեն հետաքրքրում:
-Տիկի՛ն Հովհաննիսյան, ՔԿՀ-ում լրագրողի դիտանկյունից նայած կլինեք ազատազրկմանը, պայմաններին, նաև խախտումներին ու բոլոր մութ կետերին: Ի՞նչ է կատարվում կին դատապարտյալի հետ ճաղերից այն կողմ:
-ՔԿՀ աշխատակազմը բավականին ադեկվատ մոտեցում է ցուցաբերում։ Ինչ վերաբերում է կոնկրետ ինձ, կալանավորման սկզբնական շրջանում խնդիր կար այնպիսի պայմաններ ստեղծել, որ ես ինձ շատ վատ զգամ, ես հետագայում կանդրադառնամ այդ ամենին: Ընդհանուր առմամբ, պայմաններն այնպիսին են, ինչպիսին են ՀՀ-ում պայմանները ազատ քաղաքացիների համար: Պատկերացրեք, թե ինչպիսին կլինեն պայմանները ոչ ազատ քաղաքացիների համար:
-Ի՞նչ դաս տվեց ազատազրկումը Ձեզ` հետագայի համար:
-Ես ինքս իմ մեջ որոշեցի, որ ի սկզբանե պայքարել եմ ճիշտ գաղափարի համար, էլ ավելի ամրապնդվեց իմ մեջ պայքարելու ցանկությունը ու դա իրագործելու կամքը: Իմ կամքի ուժը բավականին ամրապնդվեց։ Երբ դու հասկանում ես, որ քեզ ուզում են տոտալ ոչնչացնել, որովհետև դու կամ քո ասածը, որը ճշմարտություն է, դուր չի գալիս որոշ մարդանց, դու բնականաբար ավելի ուժեղանում ես: Ես չկոտրվեցի և այլևս երբեք չեմ կոտրվի:
-Իսկ ձեր մտերիմների շրջանակը նոսրացա՞վ, թե՞ ոչինչ չի փոխվել։ Ազատազրկումից հետո ինչպես է ստացվում ինտեգրվել հասարակությանը, այստեղ խնդիրներ,խոչընդոտներ տեսե՞լ եք այս օրերի ընթացքում:
-Այս օրերի ընթացքում ես տեսել եմ, որ շատ մարդիկ ավելի սերտ են ուզում շփվել ինձ հետ, ճնշման դեմ պայքարում ես մենակ չեմ: Կապ են հաստատել նաև միջազգային լրատվամիջոցներ, որոնք այս թեման դիտարկում են ոչ թե որպես անձի թեմա, այլ ազատ խոսքի իրավունքը սահմանափակելու հարց: Որևէ մեկի կողմից ես այլ վերաբերմունք չեմ զգացել, ես զգացել եմ լավ վերաբերմունք, քաջալերող վերաբերմունք, և բոլոր գիտակից մարդիկ հասկացել են, թե ինչ էր կատարվել:
-Գաղտնիք չէ, որ քրեակատարողական հիմնարկներում դրսի մարդկանց կողմից ազդեցություն լինում է: Ձեր նկատմամբ ճնշումներ եղե՞լ են:
-Ես ասեմ մի նախադասությամբ. ողջ նախաքննության ընթացքում, բացի ֆիզիկական ճնշումներից, արվել է ամեն ինչ, որպեսզի ես ուղղակի կոտրվեմ:
-Ձեր խոսքից հասկանալի է դառնում, որ շարունակելու եք զբաղվել լրագրությամբ։ Այս ընթացում կայքը ևս շարունակում էր գործել,ինչպե՞ս էր շարունակում: Նաև ասում եք, որ չեք լռելու: Այդ դեպքում, ինչպես ինքներդ եք նշում` այդքան «թանկ» ինֆորմացիա ունենալով, Ձեզ ինչպե՞ս են թույլ տալիս նորից լինել ազատության մեջ:
-Դա իրենք թող մտածեն: Այսինքն` իրենք փորձեցին, արեցին ամեն ինչ: Վերջիվերջո, ես չեմ կարող ասել, թե ինչ են պլանավորում կամ ինչ նոր քայլեր պետք է անեն իմ դեմ, փաստացի փորձեցին անել ամեն ինչ, բայց թե ինչ նոր քայլեր կանեն, ինձ չի հետաքրքրում: Դա թող իրենք մտածեն, որովհետև այս խնդիրը ՀՀ-ում լուծում չստանալու դեպքում միանշանակ տեղափոխվելու է միջազգային հարթակներ, և այնտեղ խնդիր է ունենալու ՀՀ-ն:
Ես չեմ ցանկանում ՀՀ-ի վարկանիշի մասով խայտառակ վճիռ ունենալ ՄԻԵԴ-ում, բայց, մյուս կողմից, մենք չենք կարող որևէ բան փոխել, եթե մենք ցույց չտանք իրականությունը և ամեն մեկս մեր չափով չպայքարենք արատավոր երևույթների դեմ:
-Ե՞րբ սպասենք ձեր բացահայտումներին, Ձեր ասած՝ հետագայում, առաջիկայում ասվածն ինչո՞վ է պայմանավորված։ Ձեր գործունեության մեջ շեշտադրումներ փոխվելո՞ւ են:
-Որպես լրագրող` ես հասկացա, որ մենք այսօր ունենք այնպիսի իրականություն, որտեղ մենք շատ անելիքներ ունենք և պետք է պայքարենք մեր իրավունքների համար: Ինչ վերաբերում է բացահայտումներին, ես կանդրադառնամ շատ այլ տարբեր հարցերի:
-Բացահայտումներն անձերի՞ շրջանակում են լինելու, անհատնե՞ր են, անուննե՞ր են, գործե՞ր են, փաստե՞ր են:
-Իմ դեմ աշխատեց մի ամբողջ պետական համակարգ, այսինքն` ՀՀ ողջ իրավական համակարգն աշխատեց մի լրագրողի դեմ` վերացնելու համար մի երիտասարդ կնոջ: Բնական է, պետք է լինեն բացահայտումներ և պետք է պատասխան տան այն մարդիկ, ովքեր այս ամենը հետևողական, ջանասիրաբար պատվիրեցին, աջակցեցին և իրագործեցին:
Ի դեպ` ԱԺ պատգամավոր Տիգրան Ուրիխանյանի կողմից ներկայացված քաղհայցերին անդրադարձ չի եղել, որովհետև Դատական տեղեկատվական համակարգից Tert.am-ը տեղեկացավ, որ պատգամավորը հետ է վերցրել նախաքննության և դատաքննության ընթացքում Անի Հովհաննիսյանի դեմ ներկայացրած բոլոր քաղաքացիական հայցերը։










