Դատարանը փորձում է կոծկել պարանոյա հիվանդությամբ ու նախկինում դատված վկայի ասած հակասությունները. Անդրիաս Ղուկասյանի պաշտպանն ինքնաբացարկի միջնորդություն ներկայացրեց

13:35 • 07.11.17

Էրեբունի և Նուբարաշեն վարչական շրջանների ընդհանուր իրավասության դատարանում շարունակվում է «Ոտքի՛ Հայաստան» քաղաքացիական նախաձեռնության համակարգող Անդրիաս Ղուկասյանի դատավարությունը՝ դատավոր Վարդան Գրիգորյանի նախագահությամբ: 

Դատական նիստին Անդրիաս Ղուկասյանի պաշտպան Կարեն Մեժլումյանը միջնորդություն ներկայացրեց, որ նախքան վկաների հարցաքննությունը թույլատրվի տեսանկարահանում իրականացնել, որովհետև ինքնաբացարկի միջնորդություն է ներկայացնելու դատավորին։

Դատավորը մերժեց միջնորդությունը։

Այնուհետև Կարեն Մեժլումյանն ինքնաբացարկի միջնորդություն ներկայացրեց դատավորին` հիմնավորելով, որ առանցքային վկայի հարցաքննության ժամանակ դատավորը կողմնակալ վերաբերմունք է ցուցաբերել։

«Նախորդ նիստի ժամանակ նախագահող դատավորը ցույց տվեց, որ անկողմնակալ չէ և հանդես է գալիս մեղադրողի կողմից։ Առանցքային վկան՝ Գեղամ Սահակյանը, ում ցուցմունքի վրա էլ կազմվել է մեղադրանքը, նախկինում երկու անգամ դատված է եղել և պարանոյա հիվանդություն ունի։ «Պարանոյա»-ն հունարենից թարգմանած նշանակում է խելագարություն։

Ահա այդպիսին է մեղադրող կողմի թիվ մեկ վկան, իսկ դատարանը հանում էր պաշտպանական կողմի հարցերը, իսկ նրա ցուցմունքն էականորեն տարբերվում էր նախաքննական ցուցմունքից։ Նա հայտարարեց, որ իր նախաձեռնությամբ է գնացել Անդրիաս Ղուկասյանի հետ հանդիպելու համար, այնուհետև ասաց, որ հարևանների հարցով է զանգել Անդրիաս Ղուկասյանին։

Նախաքննական ցուցմունքում քննիչի հարցին ի պատասխան հայտնել է, որ Ղուկասյանն է զանգել իրեն, որին չի պատասխանել, այնուհետև մեկ օր անց ինքն է զանգել Ղուկասյանին։

Նախաքննական ցուցմունքում ասաց, որ Ղուկասյանն է խնդրել իրեն գնալ «Ժառանգություն» կուսակցության գրասենյակ։ Առերեսման ժամանակ հայտնել է, որ ինքն է զանգել։ Նա կամ ուղղորդված ցուցմունք է տվել, կամ հակասությունները պայմանավորված են նրա հիվանդությամբ։ Այնինչ այդ ժամանակ չեն իմացել, որ Անդրիաս Ղուկասյանի հեռախոսազանգերը գաղտնալսվում են և պարզվել է, որ Սահակյանն է նախաձեռնել Ղուկասյանի հետ հանդիպումը»,-միջնորդությունը ներկայացնելիս ասաց Մեժլումյանը։

Նա նշեց, որ չնայած ակնհայտ հակասություններին, դատարանը մերժել է հրապարակել վկայի նախաքննական ցուցմունքը։

Նրա խոսքով՝ ՊՊԾ գնդում տեղի ունեցող իրադարձությունների և ոստիկանների տեղակայման մասին ևս տարբեր ցուցմունքներ է տվել նախաքննության ժամանակ և դատարանում, նույնն է տեղի ունեցել նաև առերեսման ժամանակ։

«Դատարանը դատախազի հետ փորձում է կոծկել վկայի ասած հակասությունները։ Դատավորն ու դատախազը թույլ չեն տալիս ի հայտ բերել վկայի ցուցմունքների հակասությունները։ Թույլ չտալով հրապարակել նախաքննական ցուցմունքը՝ խախտել է քրեադատավարական օրենքի իմպերատիվ պահանջը»,-ասաց Մեժլումյանը՝ հավելելով, որ վերը նշված հիմնավորումներով միջնորդում է ինքնաբացարկ հայտնել։

Անդրիաս Ղուկասյանն էլ ասաց, որ Գեղամ Սահակյանի ցուցմունքն ունի քաղաքական նշանակություն իշխանության համար։

«Իշխանությանը միջազգային հանրությունը հարցնում է, թե ինչո՞ւ տվյալ գործով 7 հոգի են եղել մեղադրյալ, և բոլորն ազատ են արձակվել, բացի Անդրիաս Ղուկասյանից։ Իշխանության պատասխանն է եղել՝ որովհետև կան օբյեկտիվ ապացույցներ։ Գեղամ Սահակյանի ցուցմունքը հենց այդ՝ իրենց ասած օբյեկտիվ ապացույցն է։ Հիմք է վերցվել նրա ցուցմունքը և որոշումներ են կայացրել, այդ ցուցմունքի հիման վրա ինձ առանձին մեղադրանք է առաջադրվել։ Սա սովորական ապացույց չէ, և ունի քաղաքական նշանակություն։ Հիմա Գեղամ Սահակյանի ցուցմունքը փոխվել է մեկ տարվա ընթացքում, իսկ դատարանի գործողությունը, որ թույլ չտան հրապարակել հակասությունները,սպասարկում է իշխանության շահը, որովհետև իշխանությունը չի կարող միջազգային հանրությանը բացատրել, թե ինչո՞ւ փոխվեց ցուցմունքը, որի հիման վրա քաղաքական գործիչ է կալանավորվել, մի մարդու ցուցմունքի հիման վրա, ով տառապում է պարանոյա հիվանդությամբ։ Սա կունենա իր հետևանքը»,-ասաց Ղուկասյանը։

Մեղադրող դատախազ Պետրոս Պետրոսյանն առարկեց միջնորդությանը՝ այն համարելով անհիմն. «Նախ ներկայացված միջնորդությունից կարելի է հասկանալ, որ կասկածի տակ է դրվում կողմնակալ դատավորի անաչառությունը, որին անդրադարձ կատարված չէր։ Ինչ վերաբերում է որպես հիմնավորում նախաքննության ցուցմունքը չհրապարակելուն, ապա ասեմ, որ դատարանը նշել է, որ նախաքննական ցուցմունքում ու դատարանում տված ցուցմունքներում էական հակասություններ չկան։ Ինձ մոտ տպավորություն ստեղծվեց, թե վիճաբանության փուլում ենք գտնվում։ Անտեղի մեջբերումներ կատարվեցին Վճռաբեկ դատարանի որոշումներից, այս փուլում դրանք մեջբերելն իրավաչափ չէ»։

«Մեղադրողն ասաց՝ այս փուլում չեմ անդրադառնա ցուցմունքների հակասությանը. բանը նրանումն է, որ դա թույլ չտալով՝ մեզ զրկում եք դատական վիճաբանությունների փուլում այս վկայի ցուցմունքին անդրադառնալ և ներկայացնել հակասությունները, դուք մեզ զրկում եք պաշտպանվելու իրավունքից»,-արձագանքեց պաշտպանը։

Դատարանը գնաց խորհրդակցական սենյակ։ Ինքնաբացարկի վերաբերյալ որոշումը կհրապարակվի 2,5 ժամ անց։

Հիշեցնենք, որ Ղուկասյանին մեղադրանք է առաջադրվել 2016թ. հուլիսի 29-ին Երևան քաղաքում զանգվածային անկարգություններ կազմակերպելու, հուլիսյան դեպքերի ժամանակ Մ. Խորենացի փողոցում ՀՀ ՊՊԾ գնդի տարածքում գտնվող շենքերը, շինությունները և տրանսպորտային միջոցները զավթած, ոստիկաններ և բուժաշխատակիցներ պատանդ վերցրած կազմակերպված զինված խմբին միանալու փորձի, ինչպես նաև «զինվելու, ապօրինի կերպով հրազեն ու ռազմամթերք կրելու, պահելու և խմբի անդամների հետ համակատարմամբ զավթած ու պատանդներին պահելու փորձերի մեջ», սակայն հանցագործություններն ավարտին չի հասցրել իր կամքից անկախ հանգամանքներով:

Ըստ մեղադրանքի՝ Անդրիաս Ղուկասյանի գործողություններից տուժել է 36 անձ: Նրան մեղադրանք է առաջադրվել ՀՀ ՔՕ-ի 225-րդ հոդվածի 1-ին մասի, 34-219-րդ հոդվածի 3-րդ մասի 1-ին կետի, 34-218-րդ հոդվածի 3-րդ մասի 1-ին կետի, 34-235-րդ հոդվածի 3-րդ մասի հատկանիշներով: